Nongpoh, Jymmang 21: Ka Khasi Students’ Union, North Khasi Hills District Unit ka la ioh ban ban pynskhem pura ïa ki nongkitkam bathymmai ka KSU Pahamlapong bad Pahamsohthri unit ban nang pynïar ïa u tnum u tyndai jong ka jingshakri jong ka seng.
Ïa ki nongkitkam ba pura jong katei ka Unit la wan ban pynskhem da sa u Samla Pynkmenlang Sanmiet Education Secretary jong ka KSU sengkmie, haka jingdonlang ki nongïalam ka KSU NKHD naduh u Samla Ferdinald Kharkamni President, Joseph Lambok Rymbai Vice President, James Hitler Mawphniang Secretary, Bah Mathew Makdoh Rangbah Shnong bad kiwei kiwei ki nongïalam ka seng.
Ki nongkitkam ba pura jong ka KSU Pahamlapong bad Pahamsohthri Unit ki kynthup ïa u Samla Bankitbok Syiem kum u President, John Lyngdoh vice President, Kyrshanborlang Khymdeit Secretary, Balajied Syiem Education Secretary, Faster Khymdeit Organising Secretary, Risham Khymdeit Sports Secretary, Nangbanjied Nongrum Encironment Secretary, Balajied Lyngdoh Office Secretary lem bad kiwei kiwei ki dkhot.
Haba kren ha katei ka sngi hadien ka jingpynskhem naka liang u Samla Pynkmenlang Sanmiet u la sneng la kraw ïa kitei ki nongïalam ba thymmai ka KSU Pahamlapong bad Pahamsohthri ba kin long ki samla kiba don akor bad ïaid haka lynti ban ai ka jingïatreilang bad ki bor shnong, ym ban leh heh leh meng bad ban shim kabu haka kyrteng jong ka seng.
U la ong ruh ba ka KSU kam ju hikai ïaki dkhot ba kin long mawjynthut haka imlang ka sahlang, lane ban lum spah hynrei kum ki dkhot ka KSU ki dei ban don ka jingkitkhlieh ïala ka iing ka sem bad ka jaitbynriew bad kum ki dkhot ki lah ban mad shibun ki jingtynjuh ki jingkynthoh hynrei ngim dei ban tieng lane ban duh jingkyrmen, namar ka thong hi ka long ban pynurlong ïaka jingthmu ba bha bad ka nongrim, bad lyngba utei u symbai jong ka KSU bala bet ha katei ka shnong ngeit skhem ba un roi un heh un san ban ai ka jingshakri sha ki paidbah khamtam ka jaitbynriew, u la bynrap.
