Ki longkpa ki don ka bynta kaba khraw ym tang ha ka iing ka sem, hynrei haka imlang ka sahlang : MLA Nongpoh

Nongpoh, Jylliew 18: Watla ki longkpa ki don ka jingkitkhlieh kaba khraw ïaka ïing ka sem, khamtam ki khun ki kti ban pyni bad btin ïaki haka lynti kaba dei, hynrei ki longkpa ki don ruh ka bynta kaba khraw ban saiñdur ïaka imlang ka sahlang ong u Bah Mayral Born Syiem MLA ka Nongpoh haka sngi kyrpang ki longkpa (Father’s Day).
U la ong ruh ba kum ki longkpa ki hap ban bah ban kit ïaka lyngkor kaba khia hala ka tyrpeng ban don ka jingkitkhlieh ban peit ïaki jingdonkam ha iing ha sem, ban trei shitom ban kamai kajih ban btin lynti ïaki khun haka lynti kaba dei bad khamtam ban pynioh ïaki ïaka jingnang ka jingstad bad ka jingim kaba dap ba kmen, hynrei kum u longkpa u don ruh ka jingkitkhlieh kaba khraw ban saiñdur ïaka imlang ka sahlang kumba ngi im ha kane ka juk kaba dap tang da ki jingïaleh, ki kam sniew, ki kam thombor.
U Bah Mayral Born Syiem u la ai ka jingkhublei ba kyrpang ïa baroh ki longkpa haka them Ri-Bhoi bad ka jylla baroh kawei kiba don ka jingkitkhlieh hala ki jong ka ïing ka sem, haka sngi kyrpang ki longkpa, hynrei kum u MLA u la ban jur ruh ba ki longkpa ki dei ban don ka bynta kaba khraw ban rat diengkhong ïaki kam sniew haka imlang ka sahlang kumba ngi iohi ba bun naki khun samla ha kane ka juk ba mynta ki ngop ha u drok bad ki jingdih buaid, ka jingshongkha khynnah kiba ktah mationg ïaka lawei jong ki khun samla.
“Haka jaka ba ki khun ki kti kin leh tip sngi ban minot ban pynlut port hop haki jingpule, kane ka juk mynta kala kylla khongpong ha kaba bun naki samla ki ngop haki shangkhawiah jong ki jingpynshoi kiba lam sha ka jingsniew bad pynjot ïaka lawei” la ong u Bah Mayral da kaba bynrap ba kum ki kmie ki kpa ki dei ban pynlut por ban sneng ban kraw ban hikai ïala ki jong ki khun ban btin lynti ïaki khnang ba kin im haka jingim kaba dei bad kin iohmad ïaka jingseisoh kumba ki angnud haka jingim jong ki.
U Bah Mayral Born u la ban jur ruh halor ka jingjyllei jong u drok, ki kam shongkha khynnah ha kane ka juk ba mynta bad donkam ka jingïatreilang naduh ki longkmie ki longkpa ban rat diengkhong ïaki kam sniew, naka bynta ban ai ka jingkyrmen ïaki khun samla ba kin kiew shaphrang haki jingpule bad ban kot bor bad kiwei pat ki jaitbynriew kiba la kiew shaphrang, ba sa shisien pat ki khun ki kti kin lait naka tyrsim ki kam sniew bad ki jingjot ba kin long ki samla kiba don ka thong haka jingim jong ki.