Sam ja sam jingbam ka company Topcem bad Star Cement ïa ki lanot ba sahkut dheng kali ha Narpuh

Khliehriat Jylliew 18: Ki nongtrei jong ki ar tylli ki company dewbilat kiba don ha East Jaiñtia Hills District, ka Star Cement bad ka Topcem, mynta ka sngi u Blei ki la mih shakhmat bad sam ïa ka ja ka jhur bad ki jingbam, ka um ïa ki lanot kiba dang sahkut ha ka jingdheng kali kaba jur bha ha ka thaiñ Narpuh, ka jingdheng kali ha ka thaiñ ka la jan kot mynta sha ka shi taïew na ka daw ka jingtwa ka khyndew ktieh kaba jur bha ha tunel ha surok national highway ha Sonapyrdi.
Ïa ka jingbam kum ka ja ka jhur, ka um, la sam sha baroh ki nongñiah kali, ki nongshong kali kiba dang sahkut ha katei ka thaiñ Narpuh kaba la sdang da ka ophis u Deputy Commissioner ka East Jaiñtia Hills District naduh hynnin mynmiet sngi saitjaiñ.
Ka long shisha kaba i sangsot bad don ki nongñiah kali (trok) kiba jngai ka lynti kiba wat tang u khaw ban shet ruh kim don shuh hapoh kali, donbok ba ki briew jong u DC ki la sam ja sam jhur hynin mynmiet, ka la long ka jingkyrkhu ïa ki lanot.
Kum ban shu pynkynmaw, ka jingdheng kali ha ka surok national highway ha Narpuh ka la don mynta shi taïew, na ka daw ka jingtwa kyndew bad jinghap ki maw hajan ka tunel ha Sonapyrdi ha kaba baroh ki kali kiba ïaid lyngba na kane ka surok ki la sahkut lut baroh