Nongstoiñ, Jylliew, 18: U MLA jong ka Nongstoiñ Constituency Bah Gabriel Wahlang watla ïalade u don jngai na Nongstoiñ, hynrei u la phah ïa u kyrwoh sngew lem sha kiba haïing hasem jong ki ar ngut ki heprit kiba la khlad noh na ka daw ka jingtap khyndew kaba la jia ha ka shnong Mawiong Pyndengrei dang shen.
Na ka liang u MLA u la pynpaw ka jingsngewsih halor kane ka jingjia bad u la kyntu ïa ka ophis jong u myntri rangbah ban kner jingïarap kyrpang lane compensation sha kane ka longïing ba mad ïa kane ka jingjia ba sngewsih.
U la ai khublei kyrpang ruh ïa ki ophisar bad ki nongtrei jong ka tnad kaba dei peit ïa ka jingshlei um, kiba la shimkhia kyrpang ha kaba ïa dei bad jingjia shlei um kaba la jia ha ka sngi thohdieng ha wah Nondeiñ bad wah Nonbah.
