Sam ja sam jingbam ki wholesaler na Umkiang bad na Lumshnong ïa kiba sahkut ha ka dheng kali ha Narpuh

Khliehriat jylliew 17: Lyngba ka jingpynbeit ka ophis u Deputy Commissioner ka East Jaiñtia Hills District, ha kaba la bthah ïa ki nongdieh dukan wholesaler (Government whoesalers) kiba ha Lumshnong bad ha Umkiang ban sam jingbam ïa kiba sahkut ha ka jingdheng kali, kumta ki wholesaler ki la sdang naduh mynta ka janmiet sngi saitjaiñ ban sam ïa ki jingbam kum ka um bad ki biskit, la sam ruh da ka ja song ïa baroh kito ki paidbah kiba sahkut ha ka jingdheng kali ha ka surok bah National Highway-6 ha Narpuh.
Ïa kane ka jingsam jingbam, kum ki biskit bad ka um la bynset ha u bah Lalan singh Amse bad u bah Stanly Lamin ha Umkiang bad u bah Shibun Shylla, ha Lumshnong, kiba dei ki Govt. wholesalers.
Haba ïakren bad u ADC ka East Jaiñtia Hills District, u bah Alert Nongbri, MCS, u la ong ba ki bor district ki ka East Jaiñtia Hills District, mynta ka jan miet hi ki rai ban sdang ban sam da ka ja kumta la sam da ki ja song sha baroh kito kiba sahkut ha kane ka jingdheng kali ha katei ka surok NH ha Narpuh.
Kum ban shu pynkynmaw, ka jingdheng kali ha ka surok national highway ha Narpuh ka la don mynta shi taïew, na ka daw ka jingtwa kyndew bad jinghap ki maw hajan ka tunel ha Sonapyrdi ha kaba baroh ki kali kiba iaid lyngba na kane ka surok ki la sahkut lut baroh.
Ha kajuh ka por, ka jinglong jingman ka jingtwa khyndew bad jinghap ki maw kiba heh bad kiba rit ha jan ka tunel ha Sonapyrdi ka dang don bad ka surok ka dap sa tang ka khyndew ba jyrsieh, ki maw, ka um ktieh kaba tuid pathar ha surok bah, ki bor district ki la buh jingmana ïa ki kali ban iaid na kane ka surok namar ka dang buh jingma ia ki nongleit nongwan.
Ki nongtrei jong ka National Highway Authority of India ki dang bteng ïa ka kam ban pynkhuid ïa ka surok hajan ka tunel ha Sonapyrdi.