Jowai, Jylliew 13: Ka ophis jong ka District Mission Co-ordinator, SSA ha ryngkat ka District School Education Officer, West Jaiñtia Hills District mynta ka sngi kila pynlong ïa ki prokram ‘Jan Bhagidari Events & Activities’ kaba la sdang naduh ka 1 tarik u Jylliew haduh 15 tarik mynta u bnai.
Ïa kane ka prokram mynta ka sngi 13 tarik la sdang daka jingñiah Bicycle (Rally) haka por mynstep naduh Gate Kiang Nangbha Govt. College Jowai da kaba ïaid na ka surok bah Ladthnadlaboh- Iawmusiang, Mission Compound-Loomkyrwiang bad pynkut ha Community Hall ka Dorbar Shnong Chilliang Raij.
Ïa kane ka Rally la kaweh lama da ka kong M. Lakiang, DMC, SSA WJHD.
La ïathuh ba kane ka prokrom ka long shi bynt shi bynta na ka NIPUN Bharat, Samagra Shiksha Abhiyan, kaba long kyrpang na ka bynta ka G-20 bad kaba kongsan eh ka long ban pynrung ïa ka jingnang jingstad ha ki khynnah skul hapoh ka ri India. Kum ki khynnah skul ka Ri ki dei ban tip shaphang ka mei mariang, ban ai jingtip ïa ki halor ki lad jinghikai naduh ka ktien ka thylliej, ban tip ban ai jingkylli, ban nang ban ïalehkai bad ban sngewjuh ïa ki jaka pule (skul) nalor kiwei de.
Ha Chilliang Raij Community Hall la pynlong ïa ka ka porkram ba la wam ban ïashim bynta da ki khynnah skul ki nonghikai, ha kaba u ma S. Blah ula long kum u kongsan bad uba la plie ïa ka prokram “Story Telling, ka Story Telling bad ka Exhibition on Teaching Learning Material. La ïoh ruh ka jingkren pdiang da ka kong A.P Syiem (DSEO) bad ki kyntien ai khublei da u ma H.C. Lamin BMC Amlarem Block.
Shuh shuh ha kane ka sngi la don ka Story Telling ne ka jingïathuh khana ïa ki heprit ba pule ha ki Pre-Primary la wan ban sam da Ka Sam-i-naki Passah, ha ka Exhibition on Teaching Learning Material la wan ïashim bynta da ka ki khynnah ka H.K. Signh Memorial School, Jowai, St. Michael English School, Loompyrdi Iongpiah UPS SSA, Jowai RMSA School, Khimusniang Upper Primary School, Chutwakhu UPS SSA, Kurimai Memorial UPS SSA, Police Public School bad ki Model ne ki jingshna ba la wanrah da ki skul ki long beit kyrpang ha kaba ïadei bad ka Mariang kat kumba la pruid dak hapoh ka G-20 Agenda.
Khatduh la pynkut ïakane ka prokram da ka jingsam ïa ki khusnam sha ki skul ba jop ha ka Exhibition On Teaching Learning Material kiba kynthup ïa ka H.K. Singh Memorial School, Jowai, St. Michael English School bad ka Loompyrdi Iongpiah UPS SSA.
