Hapdeng ka jingïakhun ba itynnad ha pdeng madan, rung ka Khliehmawlieh bad Rangdajied sha ka final MSL

Shillong, Jylliew 13 : Ka jingïakhun knieh rung sha ka final jong ka Meghalaya State League ha ki ar jaka hynne ka sngi ka la long kaba shongshit bha khamtam haba ka jingïakhun kadei hapdeng ki kynhun kiba khlainbor bha mynta ka kynti. Ha ka semifinal kaba long ha Shillong, kata ha madan SSA Stadium, ka Khliehmawlieh Youth Club ka la ïoh ban pynliem noh ïa ka Mawlai SC haduh 3-1 kol ban jam sha ka final. Katba ha ka semifinal kaba long ha madan MDSA Mawkyrwat ka Rangdajied United ka la pynliem ïa ka Shillong Lajong.
Kumta, ka jingïaknieh ban rah ïa ka nam lahduh hapdeng ka Khliehmawlieh bad ka Rangdajied kan long ha kane ka sngi Saitjaiñ, ka 17tarik mynta u bnai ha madan SSA.
Haba phai sha ka jingïakhun kaba long ha nongbah Shillong, ka Khliehmawlieh ka la lah ban pynphai noh ïa ka kol kaba ka shah lamkhmat ha ka semifinal kaba nyngkong bad lah ruh ban pynliem syndon haduh 3-1 kol (kaba long 3-2 lada khein kyllum lang) ïa ka Mawlai SC.
Mar ïa sdang ka jingïakhun dei ka Mawlai kaba ïalehkai bha bad i kumba ka ïoh ruh ban tehlakam kham bun ka bol. Hynrei hadien katto katne ki ksiar ba ka duh ban pynkhih jar katei ka kynhun ka la sdang ban ïalehkai kham bha bad dei ha ka minit kaba 33 ba ka la ïoh shi kol lyngba u Donlad Diengdoh da ka jinglah jong u ban pynkiar ïa ka bol na u rangap kol u Handbill Savio Syiemlieh lyngba ka bol kaba pashat da u Nikelson Bina.
Kane ka la pynlong ïa ka Mawlai ban ïoh lamkhmat da 2-0 (lada khein kyllum lang) bad kane hi ka la ai mynsiem ïa katei ka kynhun ban nang jan sha ka final.
Pynban, dei tad ha ki khyndiat minit shwa ban kut ka kylla step ba ka rukom ïalehkai ka la kylla kynsan hadien ba ki rangïalehkai ka Khliehmawlieh ki la pynkylla ïa ka rukom pashat bad tan bol bad kane hi ka la pynkulmar ïa liang pyrshah baroh kawei. Katei ka rukom ïalehkai ka la plie lad ïa ka Khliehmawlieh ban ïoh khyrwit shi kol lyngba u Mainingstar Marngar ha ka minit kaba (45+1) ban pynlong ïa ka jingïakhun ban neh da 2-1 kol.
Ka kol kaba ar jong ka Khliehmawlieh ka la pynkyndit ïa baroh namar ka bol kaba khyrwit da u Livingstone Nongrang ka la kham pajih bad ym poi pyrkhat pynban ka la leit beit beit ban pynkhih ïa ka jar jong ka Mawlai. Kane ka la pynïakhaid ïa ka jingïakhun da 2-2 kol bad kane ka kol ka la nang ai mynsiem shuh shuh ïa ka kynhun ban ïakhun tyngeh.
Hadien kane ka jingïalehkai ka la nang itynnad bad ka la poi ruh haduh u pud ba u rangïalehkai ka Mawlai u la shah pynur ha phyllaw kol jong ka Khliehmawlieh kaba pynlong ïa ka Mawlai ban ïoh ïa ka kabu ksiar lyngba ka shut penalty. Kane ka rai ka la pynkhih bitar ïa ka liang jong ka Khliehmawlieh baroh kawei hynrei baroh ka la thanda jai hadien ba ka bol ba u kapten ka Mawlai u khyrwit ka la leit shabar ka kol. Hadien katei ka jingjia, ka jingïakhun ban ïoh ïa u namtam ka la nang shongshit shuh shuh bad dei ruh ha katei ka por ba ka Khliehmawlieh ka la sdang bïang ban ñion shakhmat bad kane hi ka la plie lad lyngba u Nongrang ban tan ïa ka bol shakhmat ha shwa ban pashat sha u Kyntiew Myrthong ha ka minit kaba 90 bad pyntyllun suk ïa ka bol sha ka jar, ka kol kaba pyntikna syndon ïa ka kynhun ban rung sha ka final.
Ka jingïakhun kaba kham shongshit kadei ha Mawkyrwat ha kaba ka jingïaknieh ban rung sha ka final kadei hapdeng ki kynhun kiba radbah. Haba phai sha ka jingïakhun, ka Rangdajied ka la buh lypa ha khmat ba ka hap ban pynphai haduh 3 kol tang ban pynïakhaid ïa ka jingïakhun hadien ba ka la shah thep haduh 3-0 kol ha ka Lajong ha ka semi final kaba nyngkong. Kumta ha katei ka sngi hadien ba ka la jop kylla da 3-0 kol ha Mawkyrwat, ka jingïakhun lada kheiñ kyllum lang (aggregate) ka la kut ha ka jingïakhaid da 3-3 kol. Kumta dei lyngba ka shut penalty ba ka Rangdajied ka la khur ïa ka jingjop da 4-3 kol.
Ha ka jingïakhun hapdeng madan, ïa kitei baroh lai tylli ki kol la ïoh ban thep da ki nongïalehkai barim ka Shillong Lajong, kata u Tremiki Lamurong uba la thep ar kol kata ha ka minit kaba 32 bad 73 bad ïa ka shi kol pat la ïoh ban thep da u Batskhem Thangkhiew ha ka minit kaba 56. Lah ruh ban ong ba kane ka lympung ïalehkai mynta u snem kadei ka lympung kaba shongshit bad kaba kham phylla lada nujor bad ki lai tylli ki jingïakhun kiba la dep shakhmat.
Kumban shu phaidien, ha ka MSL 2019 ka Shillong Lajong ka la pynliem ïa ka Rangdajied ha ka penalty ban khur ïa ka nam lahduh hynrei mynta ka kynti pat ka Rangdajied ka ïoh ban pynliem kylla ha ka semi final ban rung sha ka final.