Shillong, Jylliew 12: Lehse namar ka jingkhie ka jingïakynad jaidbynriew ha Manipur, ka Central Agriculture University (CAU) Imphal, ha kine ki khyndiat sngi baladep, ka la pynkynriah treikam noh ïa kumba 7 ngut eiei ki nongtrei kiba la suba ba kadei na ka jaidbynriew Kuki sha ka College of Agriculture kaba don ha Kyrdemkulai.
Ki Notification ba la pynmih da u Vice Chancellor kane ka skul bah ba ai jinghikai halor ka rep ka riang, kiba la ïoh da u Mawphor ki pynpaw ba kane ka jingpynkynriah treikam ïa kine ka long na ka bynta lai bad hynriew bnai bad lehse lah ruh ban pynjlan. Ki khubor ki ong ba kane ka jingpynkynriah kam ba tang katto katne bnai, ka paw ba kadei ban lait na kino ki jingjia ba sngewsih namar ha Imphal kadei ka jaka kaba shong shnng kham bun ki Meitei kiba don hapadeng ka jingïakynad kaba jur bad ki jaidbynriew Kuki.
Lah bn kdew hangne ba ha ka jingshisha ïa ka CAU la pan ban buh ha Meghalaya,ha kaba ka sorkar jong u Dr. Mukul Sangma bad jaka ruh la ai ha Kyrdemkulai, Ri Bhoi District. Hynrei hadien ba la wan shimti ka sorkar u Conrad Sangma ha ka snem 2018, ka sorkar India ka la pyntip ba kja CAU kan leit sha Imphal, Manipur bad ka kaba la pan ha Meghalaya kan long tang kum ka College.
Kane ka jingpynkylla ka la pynbitar ïa ki paidbah ka jylla bad ka la wanrah ruh ka jingïatainia kaba jur ha Assembly, ha kaba ka Congress kaba ha katei ka por kam pat pait ka la ther tyngeh ïa u Bah Banteidor Lyngdoh, Myntri ka tnad Agriculture jong ka jylla bad kumjuh ruh ïa ka sorkar hi baroh kawei.
Nangta ka Seng KSU ruh ka la khih puk, ha kaba ki dkhot jong ka, ki la hiar sha ka Campus kaba don ha Kyrdemkulai ban ïakhih hakhmat kane ka Campus bad sieh ruh ïa ka Signboard kaba thoh Central Agriculture University, Kyrdemkulai,Meghalaya.
Ka sorkar u Conrad ka la ïathuh ba ka la leit sha Delhi ban ïakren ïa kane ka jingpynkylla na ka University sha ka College. Hynrei haduh mynta kane ka kam ka la shu sahkut kumto bad ka University ka la shu sah kum ka College bad ïa baroh ki kam ki jam, la pynïaid beit na ka CAU, Imphal.
