Pynkup burom ka KSU ïa ki 3 ngut ki samla ba ïoh Top-10 bad Top-20 ha ka SSLC bad HSSLC

Mawkyrwat, Jylliew, 11: Ka Khasi Student’s Union (KSU) jong ka South West Khasi Hills District lyngba ka Education Cell kum ka dak ban ai mynsiem lem ka la ïoh ban pynkup burom ïa ki lai ngut ki samla kiba la poi ha ka kyrdan Top-10 bad Top-20 ha ka SSLC bad HSSLC ba dang shu pyllait shen da MBOSE.
Lah ban kdew ba ki lai ngut kiba kynthup ïa ka samla Phibalamti Marweiñ kaba la poi ha ka kyrdan ba 7 ha ka HSSLC (Commerce Stream) na ka shnong Mawlangwir, u samla Nangkhraw Laloo uba la poi ha ka kyrdan ba 8 ha ka HSSLC (Commerce Stream) na ka shnong Mawsynram bad kumjuh ruh ka Heprit Jessica Marweiñ kaba la poi ha ka kyrdan ba 20 jong ka SSLC.
U samla Evansroy Nongrem, Education Secretary jong ka KSU South West Khasi Hills District u la pynpaw ba kham pher la ki wan na kano kano ka longïing hynrei haba ka mynsiem ka don ka lad ka plie da kaba ai ruh ki symboh ki dei ban long kiba ïatrei shitom bad minot khamtam haba kum kane ka juk kaba hap ban ïa khun ha shibun ka thma pyrkhat. Ha kajuh ka por u la ai ruh ki kyntien kitbok kirwiang ba kin nang ïaitrei shitom nangne shakhmat khnang ba kin long ka nuksa ïa kiwei pat ki para samla jong ka dong ka thaiñ ka jaidbynriew hi baroh kawei.
Haba phai pat u samla jiedskhem Nongsiej, General Secretary ka KSU South West Khasi Hills District u la ai ka kitbok kitrwiang ïa ki lai ngut ki samla da ka pynpaw ruh ba ka pule puthi ka dei kawei ka i-ktiar ban tei ïa ka jaidbynriew ka ban long ka shongshit shongshngaiñ na bynta ka lawei jong ka jaidbynriew.
Nalor u samla Jiedskhem Nongsiej, General Secretary ka KSU South West Khasi Hills District bad u samla Evansroy Nongrem, Education Secretary ka KSU South West Khasi Hills District la ïa don ryngkat ki katto katne ki nongïalam jong ka KSU South West Khasi Hills District kata u bah Dusterwell K. Lyngdoh, Finance Secretary ka KSU South West Khasi Hills District bad ryngkat bad ki kmie ki kpa kiba ha ïing ha seng jong ki lai ngut ki samla.