New Delhi, Jylliew, 10: Ka Sorkar India ka la thaw ïa ka Komiti na ka bynta ka Jingïasuk ha Manipur hapoh ka jingïalam jong ka Lat ka Jylla Manipur ka Anusuiya Uikey. Ki dkhot jong kane ka komiti ki kynthup ïa u Myntri Rangbah, katto katne ki Myntri ka Sorkar Manipur, ki MP, MLA bad ki nongïalam na ki seng saiñ pyrthei.
Ka komiti ka kynthup ruh ïa ki nongtrei Sorkarbarim, ki nonghikai, ki nongthoh kot, ki barikor, kito kiba trei ha ki kam kiba ïadei bad ka imlang sahlang bad ki nongmihkhmat na ki jaitbynriew bapher bapher.
Ka kam ba la buh hakhmat jong kane ka komiti ka dei ban plie lad ïa ka jingïasuk hapdeng ki jaitbynriew bapher bapher jong ka jylla, kaba kynthup ruh ïa ka jingïakren hapdeng ki kynhun kiba dan ïa umsnam.
Ka komiti ka dei ban pynkhlaiñ ïa ka jingïatylli ha ka imlang sahlang, ka jingïasngewthuh jingmut bad ka dei ruh ban plie lad ïa ka jingïakren hapdeng ki jaitbynriew bapher bapher.
U Myntri ka tnat Kam Pohing ka Sorkar Pdeng u uAmit Shah u la don ha Manipur naduh ka 29 tarik, Jymmang 2023 haduh ka 1 tarik u Jylliew 2023 bad u la pynbna ïa ka jingthaw ïa ka Komiti na ka bynta ka Jingïasuk hadien ba u la leit peit ïa ki jinglong jingman ha Manipur na ka jingïaumsnam hapdeng ki jaidbynriew Meitei bad ki Kuki ha kaba da ki hajar ngut ki nongshong shnong ki la kylla phetwir.
