Ngam leit kawang maw ïa ki pulit ban pynlait ïa ki shnong na ka Building By-law ka MUDA: Paul Lyngdoh

Shillong, Jylliew 05: U EM barim jong ka KHADC uba long mynta u myntri ha ka sorkar MDA u Bah Paul Lyngdoh u la takraiñ tyngeh ïa u Bah Ardent M Basaïawmoit halor ki sienjam ba u la shim ha u snem 2015 ban ïalam ïa ki paidbah ban tur sha Secretariat ban dawa na ka sorkar ban weng ïa ka jingpynjari ha ki jaka bym dei ki jaka sor na ki aiñ shna iing ka MUDA ha kaba kane ka jingïakhih ba la ïalam da u Bah Ardent kam mih soh eiei.
Ha ka jingïakren sha ki lad pathai khubor u Bah Paul u la ong ba ha u snem 2015 u Bah Ardent u la ïalam ïa ki paidbah ha kaba ka don ka jingshah kawang maw ki pulit bad ki nongthoh khbor ruh hynrei kane ka jingïakhih kam mih eiei lat tang ka snam bad, ‘dei tad ynda nga la long EM ha KHADC ryngkat bad u CEM ngi la leit ban ïakynduh ïa u Myntri ka tnat kam pynroi sor u Bah Shniawbhalang Dhar khlem rah maw khlem rah jri ban kawang ïano ïano, ha ka jingleit kynduh ha ka sien kaba ar u Advocate General jong ka Meghalaya u la kubur ba ki shnong bym dei ha sor dei ban ai sha ka District Council bad la pynkylla ruh ïa ka Meghalaya Building By-law bad na ka liang jong ngi ka KHADC ngi la thaw ruh ïa ka bulidng Regulatory Authority bad ka ka jingleh jong ngi ka long kaba jop ha kaba wat ha ka jingshna ïa ka assembly ba thymmai ka sorkar ka hap pan jingbit na ka KHADC,” u la ong.
“Ym tang katta hynrei ka sorkar ka la ai ruh ïa 6 tylli ki city center ban hap hapoh ka jingpeit jong ka KHADC, kane ka jingjop ka dei da ka jingïakhun kat kum ka iktiar ba la pynkup ym ba ngi leit kyrdem ïa ka miej u Myntri,” u la bynrap.
Haba taraiñ ïa ka jingïakhih shah thngan u Bah Ardent ban dawa pynbeit thymmai ïa ka Reservation Policy, u Bah Paul u la ong ba kane ka dei tang ka drama jong ka VPP.
“Ym tang ba ki pynkylla ishu saiñ pyrthei ïa kane ka mat hynrei ka wanrah ruh ïa ka jingsngew pher jaidbynriew bad ka jingïashun hapdeng ki jaidbynriew ba don ha ka jylla,” u la ong.
U la ong ruh ba kiba kam nongïalam ki dei ban long kiba shlur ‘ym kum kito kiba kam nongïalam hynrei wanrah u Mukul ïa ka aiñ ba kheiñ bam armaloi ïa ki MDC ba long MLA uwei u MDC ba kam nongïalam u resign noh wut wut lait noh tang u Bah PN Syiem uba pynpaw ïa ka jingshlur kaba shisha bad ngi hap ai burom ïa kane,” u la ong.
U la ong ruh ba ka jingdawa u Bah Paul ha ki snem ba mynshuwa ban dawa pynkylla ïa ka Reservation Poliy ka sakhi haduh kine ki sngi ha kaba wat ha ki rynsan social media ki la phriang ïa ka jingkren jong u.
“Hato phi lap ïa ka jingkren u Bah Ardent ïa kane ka jubab kaba shai ka long beit Em namar um kren eiei ïa kane namar u dei u nongïalam ka FKJGP ba don lang ki Garo,” u la ong.