Kam ka BJP ba 60 % la dep pynbeit pud hapdeng ka Meghalaya bad Assam, ai burom ia u PM

Shillong, Jylliew 05: Haduh mynta ka jingïa pynbeit pud hapdeng ka jylla Meghalaya bad Assam, lah ban ong ba la pyndep haduh 60% bad hapoh une u snem yn lah ban pynbeit lut baroh 100%.
ïa kane la kam da u President ka Bharatiya Janata Party (BJP) Meghalaya bah Ernest Mawrie uba la ong ruh ba kane ka jingïa pynbeit pud hapdeng Meghalaya bad Assam ka la sdang hadien ka jingshim khia u Myntri Rangbah duh ka ri India u Narendra Modi hadien ba ula wanphai biang ha ka bor ha u snem 2019.
“Hadien ka jingshimti biang u Narendra Modi kum u Myntri Rangbah duh ka ri India ha u snem 2019 ula ban jur ba ka la donkam ban pynbeit noh ïaka jingïakjia pud hapdeng ki jylla hapoh ka thaiñ Shathei Lam Mihngi (North East) bad naka liang u Myntri ka tnat kam pohïing ka sorkar pdeng u Amit Shah ula shim ka jingkitkhlieh ban ïasyllok bad ki Myntri rangbah jylla ka Meghalaya bad Assam ban pynïaid shakhmat ïa ka jingpynbeit pud” ong u bah Ernest.
U bah Ernest ula ong ba haduh mynta ki artylli ki sorkar jylla ki la dep ban pynbeit ïaki jingïakjia pud ha ki 6 tylli ki jaka na ki 12 tylli kiba don hapdeng ka jingïakajia, lyngba ka jingïasoi iaka Memorandum of Understanding (MoU) bad mynta ka kynti ka jingïakren bad pynbeit sa ïa 6 tylli ki jaka ïakajia kala ïaid shakhmat.
U bah Ernest ula kynnoh ba ka jingslem ban pynbeit pud hapdeng ka Meghalaya bad Assam ka dei hi namar ka jingïaleh Politiks ka Congress haka por ba ka synshar ha Delhi bad ha kine artylli ki jylla.
Ula ong ba hadien ka jingshimkhia ka sorkar pdeng ba ïalam ka BJP, u Myntri Rangbah ka jylla Meghalaya Conrad K Sangma bad u Myntri Rangbah ka jylla Assam Himanta Bisawa Sarma, ki la kloi ban shim ka jingkitkhlieh ban pynbeit noh ïaka jingïakajia pud hapdeng baroh 2 tylli ki jylla.
“Hoid ki dang don katto katne ki jingïakajia hynrei na ka liang ka BJP ka ai khublei ïa ki Myntri Rangbah jong kine artylli ki jylla kiba la shim khia ban sdang noh ka jingïakren pynbeit na ka bynta ban wanrah ïa ka shong suk shong shngaiñ hapdeng ki paidbah jong baroh artylli ki jylla” ula ong.