Bam shngiam ki khñiang ïa u jyntang Phan ha South West Khasi Hills, lynñiar ki paid nongrep

Mawkyrwat, Ïaïong, 28: Ka long kaei kaei kaba pynduh mynsiem na ka bynta ki paidbah nongrep jong ki shnong kiba hapoh ka South West Khasi Hills District ha kaba mynta ka kynti ki la ïa kynduh jingeh ha ka liang ka rep ka riang namar la ïohi ba ki khñiang ki la bam duh khoit ïa u jyntang phan la ka long ïa u phan ba ki thung ha pynthor kba ne wat ha ki kper ruh.
Katkum ka jingïoh lum jingtip na ki katto katne ki nongrep, la ong ba kane ka jingshah pynjot jong ki jingthung kum u phan ha kaba kita ki kynja khñiang ki la wan ban bam duh ïa ki sla bad u jyntang phan ka long tang mynta u snem. “Ha ki snem kiba la leit kam da jur than, hynrei ha une u snem 2022 pat ka la long shaba palat bad ka jur bha ka jingshah pynjot”, ong ki nongrep.
Haba kren ha ki nongthoh khubor na ka liang ka kong Korda Ramsiej bad u bah S. Lyngkhoi kiba na ka shnong Pyndensakwang, South West Khasi Hills District ki la ïathuh ba kum kane ka jingjia ba shah bam duh u jyntang phan ha ki kynja khñiang ka jur bha tang mynta u snem bad ha ki snem kiba la leit une u khñiang u don, tangba u kham duna. “Lada ka long kumne ma ngi ki nongrep ngin sa duh nong bad duh ruh wat ban buh ïa ki symbai phan na ka bynta ban thung pat ha ka snem ka ban sa wan”, ka la ong.
Ki la ong ruh ba lada ka long tang kumne, kum ki nongrep kin sa don hapdeng ki jingeh ha kaba kim lah shuh ban pyndap pynbiang ïa ki jingdonkam ha ïing ha sem, namar ha ki snem kiba la leit kum ki nongrep lyngba kane ka kam ki ju ïoh ban bsa ïa ka ïing ka sem, ban pynthied ïa ki kot pule ne wat ban phah skul ïa ki khun ki kti.
Kumta lada long kaba lah na ka liang ka sorkar kan sngewbha ban ai jingïarap lem ïa ki nongrep phan da kino kino ki lad ki lynti ban pynïap ïa kine ki khñiang khnang ba kan nym don kano kano ka jingeh ïa ki nongrep ban pyntyllun ïa kane ka kam rep phan ha ki snem ki ban sa wan.