Ailad ka Komiti ïa ki Political Party ban phah ïa ki jingai jingmut halor ka Policy hapoh 15 sngi

Shillong, Jymmang 31 : Ka jingïalang jong baroh ki political party ba la khot da ka komiti halor Reservation Roster System ka la ïatai bun kynta bha ha kane ka sngi Balang ban ïathir sani halor katei ka mat kaba la khihwin bha ha ka jylla khamtam eh da ka jingshah thngan u nongïalam ka VPP, Bah Ardent Miller Basaïawmoit.
Haba kren bad ki lad pathai khubor hadien ka jingïalang, ka chairperson jong ka committee, Dr. Ampareen Lyngdoh ka la ong ba hadien ka jingïathir bad ïatai, ka kamram jong ka komiti ka long ban phah pat ïa ka kaiphod sha ka sorkar.
Da kaba kubur ba ki don kiba pynpaw ba donkam ban don noh da ka Expert Committee, ka chairperson ka la ong, “La ailad ban ïa kren hapdeng ki political party halor ka state reservation policy. Hynrei kane ka mat ka dang neh namar bun ki political party ki wan ban pynsngew tang da ka ktien khlem da don ki jingpynshisha.”
Shuh shuh ka ong ruh ba mynta kitei ki political party ki hap ban leit phai biang bad ban pynshisha ba lei ki kwah ban weng lane ban pynrung ïa kino kino ki kyntien hangtei bad ruh ban pynshisha balei ki kwah kumta. “Lada phi kwah ïa kano kano ban weng ne pynrung thymmai ha ka Policy, phi hap ban pynksan katkum ka aiñ. Baroh dei ban wallam da ka jingthoh,” ka la bynrap biang.
Nalorkata, ka la ïathuh ruh ba ha katei ka jingïalang don ruh ki political party kiba kwah ban pynneh shwa kumba ka long (status quo) hynrei kim lah pat ban pynshisha balei donkam ïa ka ha kum kane ka por.
“Kumta, ngim lah ban shu lum lang ïa baroh ki jingïatai bad phah ïa ki sha ka sorkar hynrei donkam ïa ki political party ba kin wan bad ki jingthoh katkum ka aiñ halor ki bynta kiba ki kwah ban pynkylla, weng lane pynrung thymmai ha ka policy.”
Shwa kane, ka Chaiperson, ka la ong ruh ba jan baroh ki sngew ïahap ban don ïa ka expert committee, ka komiti kaban don lut ïa ki riewshemphang ha baroh ki liang kiba ïadei bad katei ka bynta.
La ïathuh ruh ba ka komiti ka ai por 15 sngi ïa ki political party ba kin pyndep ïa katei ka kam.
Ha kawei pat ka liang, ka la pynpaw ba ka jingïatai ha katei ka sngi ka long kaba seisoh. Ka ong ruh ba hadien ba ki la ïoh pdiang ïa kitei ki jingai jingmut, kin sa phah pat sha ka sorkar bad ka sorkar pat kan sa bishar bniah bad shim ïa ka rai ha baroh kitei ki jingai jingmut kaba ki la phah.
Kawei pat ka rai kaba ka komiti ka shim ha katei ka sngi ka long ban ïa kynduh biang hadien lai taiew.