Ktah lang ka Komiti Roster System ïa ka mat halor ka Reservation Policy

Shillong, Jymmang 29 : Ka komiti Roster System ba kynthup ïa baroh ki sengsaiñ pyrthei lait noh ka Voice of the People Party (VPP) hynne ka sngi ka la kynduh ha ka sien kaba nyngkong eh ban ïa kren halor katei ka phang bad ruh ban phah ïa ka rai sha ka sorkar jylla.
Katkum ka jingïathuh da ka Chairperson jong ka Komiti, Dr. M Ampareen Lyngdoh haba kren bad ki lad pathai khubor ka la ong ba hadien ba ki la ïoh pdiang ïa ka shithi na u President ka VPP ba kin ym lah ban wan shim bynta ha katei ka jingïalang, kum ka komiti ki la shim ruh ïa ka rai ban ai jingmut ïa ka sorkar jylla ba kan ailad ïa ka Komiti ban ailad biang ïa ka VPP ban pynsngewthuh ïa ka jingdonkam ban pynkylla ïa ka Reservation Policy.
“Hynne ka sngi ki political party ki khlem kren tang ïa ka Roster System hynrei ka la ktah ruh ïa ki katto katne ki mat kiba don ryngkat lang ha ka Reservation Policy. Ka Reservation Policy kadei ka tynrai bad ka Roster kadei tang kumno ban pynïaid ïa ka Reservation, ka kmie bad ka khun. Bad lada hap ban shim ïa kano kano ka rai kaban don ka jingktah ïa ka pateng kaban wan, donkam ban ai ïa kata ka lad ïa baroh ki political party ban don bynta lang. Ngin rah ïa kane ha ka sorkar bad kyrpad ban plie sa khyndiat ka jingkhang ba ngin ïoh ban ailad sa ïa ka VPP ba kan wan ba kan rah bad ba ngin ïohi bad ïohsngew ïa ka jingsngew ka jong ki halor ka Reservation Policy,” ka la ong.
Nalorkata, katei ka Chairperson ka la ong ruh ba yn ym lah satia ban kren ïa ka Roster khlem da kren ïa ka Reservation Policy bad baroh ki party hi ki kren ïalang ïa kane ka phang. “Kumta, ngi wer ïa ka VPP ba kan sngewbha ban wan bad ngin pan jingbit bad pan hukum namar na ka komiti kam don ia ka bor ban shim ïa kano kano ka rai, kumta ngi hap ban pynsngew ïa kane sha ka sorkar bad ngi kyrmen ba ka sorkar jylla ruh kan shah ïa baroh ki political party ban don lang.”
Katkum ka jingong jong ka, kano kano ka jingrai kan ym long kaba pura lada jia ba baroh ki political party kin ym ïoh ban don bynta lang. Ka ong ruh ba ha kaba khatduh hi baroh ki kwah ban ïatei kumta baroh ki political party ki donkam ban donkti lang. Shuh shuh ka ong ruh ba shisien ba la ktah ïa katei ka mat dei ban ktah ïa ka khnang ba kan neh bun bun snem.
Shuh shuh ka Chairperson ka kyntu bad wer ïa u President ka VPP ban don bynta lang ha katei ka jingshim rai da kaba wan sha ka jingïakren bad ban ai jingmut ïa ka komiti na ka bynta ka jingbha lang jong ka pateng ban wan.