Dawa u MLA ka Nongstoiñ ïa ka Sorkar MDA ban peit bad bishar bniah ïa ka Reservation Policy

Shillong, Jymmang, 29: U MLA jong ka Nongstoiñ Constituency u Bah Gabriel Wahlang u la kyntu ïa ka Sorkar Meghalaya Democratic Alliance (MDA) ba ïalam da ka National Peoples Party (NPP) ba ka dei ban peit bad ban bishar bniah biang ïa ka Reservation Policy, 1972 khnang ba kan ym don kano kano ka jingktah ïa ka jylla lane ka ban wanrah ïa ka jingsngew ïapher jaidbynriew.

Ha ka jingïakren bad ki lad pathai khubor ha ka Lah Sngi u Blei, u Bah Gabriel u la ong kum u nongmihkhmat ba la jied da ki paidbah ka Nongstoiñ constituency haba u kren ïa kane ka mat, kam mut ba u kren tang na ka bynta ka Nongstoiñ Constituency hynrei u kren na ka bynta ka jaidbynriew baroh kawei.““Ha kine ki sngi ba nga dang don ha ka Workshop ha Mahali, Chandigarh, ngi don 27 ngut ki MLA bad ngi ïohi ba ki don la ka jong ka jong ka jingsngewkhia halor kane. Kam dei ba kim kwah ban kren hynrei ki don la ka jong ka jingsngew halor kane ka Reservation Policy,” ong u Bah Wahlang.“Haba pynpaw ba ka jingkren jong u halor ka ishu jong ka Reservation Policy ka dei ka jingsngew shimet, u Bah Wahlang, u la ong, “kumba ki paidbah jong ka Nongstoiñ Constituency ki la jied ïa nga, bad ha kajuh ka por haba nga kren mynta ngam shym la kren tang na ka bynta ka Nongstoiñ Constituency hynrei ka jingkren jong nga ka long na ka bynta ka jylla bad na ka bynta ka jaidbynriew baroh kawei.”“U la pynpaw ruh ba ïa kane ka jingkren jong u, bun ki paidbah kin sa kren, kin sa kynthoh bad kin sa kynnoh.

Ha kaba ïadei bad ka Rervation Policy, la i donkam ban peit bniah, ban bishar bniah bad ban khmih bniah ba kan long kumno na ka bynta ka jaidbynriew jong ngi,” la ong.“U la ïathuh ba u la pyrkhat bad puson bha shwa ban kren eiei halor ka Reservation Policy khnang ba kan ym ïalam bakla hadien ba ki la don bun ngut ki briew kiba la telephone ïa u halor kane ka ishu ha kine ki khyndiat sngi.

Ha ka por elekshon nga la kyrpad ïa ki paidbah, to ïarap lem ba ngan ïadon ryngkat lang bad phi ha kiba bun ki bynta na ka bynta ka jingbha jong ka jaidbynriew jong ngi. Nga ngeit skhem ba U Blei u la don la ka jong ka bynta ban pynshai lem ïa ngi ha kane ka Reservation Policy ba kin lah ban leh ïa kaba bha tam ba ka jaidbynriew kan im bad kan ym don ha ka jingjynjar,” la bynrap u Bah Wahlang.“Da kaba kyntu ïa ki paidbah kin long kiba jaijai, u Bah Wahlang, u la ong, “ailad lem ïa ngi kum ki nongmihkhmat ba ngin nang ïoh ban tih bniah kham jylliew shuh shuh na ka bynta ka jingbha jong kane ka kam kaba ngi la ïaid. To ngin ïa ïaid ryngkat ryngkat bad ka jingngeit ha U Blei, ïa kiei kiba ngi leh kin long na ka bynta ka jaidbynriew ka jong ngi.”