Shillong, Jymmang 29: Ka Khun Hynniewtrep National Awakening Movement (KHNAM) mynta ka sngi ka la rai ban nym leit ïashim bynta sha ka jingïalang jong ka Committee on Reservation Roster ba lamkhmat daka Myntri ka tnat Law kong Ampareen Lyngdoh.
Kane ka jingkyntait ka dei namar ka sorkar ka la phah ka jingpyntip kynsan kynsan kata shi kynta hashuwa ban long ka jingïalang jong ka Committee on Reservation Roster haka jingdon lang baroh ki nongïalam seng saiñ pyrthei.
Lyngba ka kyrwoh u president ka KHNAM u bah Pyndap Saiborn ula ong “Ka long ka bym lah ban pdiang ban ïohi ba ka sorkar jylla ka phah ïa ka jingkhot ban ïa don bynta ha ka jingïalang tang shi kynta ha shuwa ban long ka jingïalang jong ka Committee. Ka Party ka la rai ban nym ïadon bynta ha kane ka jingïalang”.
U bah Pyndap ula ong ba ka Party ka la dep ban phah da ka shithi sha ka Myntri ka Law kaba dei ruh ka Chairperson jong ka Committee on Reservation Roster ha kaba “Ngi la pynsngew iaka nongrim ba kala donkam ban phai biang shaka State Reservation Policy 1972 naka bynta ban pynthikna ba ka Roster Registers ka dei ban treikam naduh u bnai Jymmang 2022 khnang ban pyntreikam ïa ka Roster System nangne shakhmat (Prospective)”.
“Ngi ïeng ha ka nongrim jong artylli ki jingdawa bad na ka liang ka Party kam kwah ban pyndep hakhmat kine artylli ki jingdawa. Namar kane kam don jingmut ban shim bynta haka jingïalang namar ym donkam shuh ban ïatai hynrei donkam beit ïa ka sorkar ban wanrah daka Resolution” ula ong.
