Shillong, Ïaiong 27: Ka Khasi Students Union (KSU) hynne ka sngi balang kala maham ban “Khie Thma” lada ka Sorkar Jylla ka mynjur ïa ka jingdawa jong ka Harijan Panchayat Committee (HPC).
“Ka Sorkar Jylla kam dei ban pyndem tdong ha ka jingdawa jong ka Harijan panchayat Committee..lada ka mynjur, kaei kaba ngi lah ban ong ba kan sa “khie ka thma”. Ka KSU ka pyrshah jur ïa ka jingdawa bad ym tang ka KSU, hynrei ki paidbah bad ki trai muluk ka Jylla kin ieng pyrshah bad ka lah ban wanwah ïa ka jingkular kaba jur ha ka Jylla” ong u samla Donald V Thabah, General Secretary ka KSU haba ïakren bad ki nongthoh khubor.
Kane ka jingmaham kala mih hadien ba ka HPC ha ka jingïalang ba dang shen bad ka Sorkar Jylla, kala dawa ïa ka Sorkar Jylla ba kan ai ei ïa ka jaka ba 10 acrea na ka bynta ban pynsah ïa ki 342 tylli ki Longïing ki ban ïoh mar 200 square meter kum ka jingïabujli ïa ka Them Metor, Them Iew Mawlong.
Haba pynpaw ba kane ka kam ka ïaid shabi kum u time bomb, u samla Donald ula ong “Kala dep jia mynshuwa bad kan sa jia biang. Namar kata, ngi kwah ban ban jur ba ym dei satia ban pdiang ïa ka jingdawa jong ki (HPC)”.
Ula dawa ruh ba ka Sorkar Jylla kam dei ban nang pynslem ha kaban pynthikna ïa ka jingpynkynriah noh ïa ki nongtrei Sorkar bad ban kyndang ïa ki nongsah be-aiñ na Them Iew Mawlong.
Une u Nongïalam ka KSU ula ong ba ka seng KSU ruh kan sa pynkhreh lupa ïa kaei kaba dei ban leh, ka ban shong ha ka rai jong ka Sorkar Jylla ïa ka jingdawa jong ka HPC. U ong ba ka jingdawa jong ka HPC ka dei ka bym lah satia ban pdiang bad kala pynlong kamkai ïa ka Sorkar Jylla bad ïa ka Jylla baroh kawei.
“Ka HPC ka dawa 10 acrea ka Jylla ban iasam mar 200 sqaure meter sha kawei ka Longïing, kaba long haduh 2000 sqft kawei ka Ïing. Lada phi peit hange ha Nongbah Shillong, ki don ruh ki briew kiba sah ha ki Ïing kiba rit bha khamtam ki briew kiba sah ha ki Ïingwai” ong u samla Donald haba bynrap “Jin ba ki sah be-aiñ ha Punjab, kin jin sa la shah kyndang naduh ka sngi ba nyngkong hynrei hangne ka Sorkar Jylla bad ki paidbah kila jem shaba palat”.
U President ka seng samla Lambokstar Marngar ula maham ba ka Sorkar Jylla kam dei ban pynsngap ïa kum kine ki jingdawa haba ong “Kim dei ban pyrshang pyni bor bad buh ïa kum kine ki jingdawa. Lada ki dang ïai bteng ban leh ïa kane, kan sa poi ka por ba ngim banse ban shim ïa kano kano ka sienjam”.
Ha kajuh ka por, kine ki Nongïalam ka KSU kila kyntu ïa ki Nongtrei Sorkar kiba sah ha Them Iew Mawlong ba kin bud ryntih ïa ka rai bala shim da ka Sorkar bad ki Tnad ba ki treikam ha kaban pynkynriah noh ïa ki.
“Ki Nongtrei Sorkar kiba sah ha Them Metor ki dei ban bud ryntih ïa ka jingbthah ka Sorkar Jylla” ong u samla Donald haba bynrap “Ïa kito kiba sah be-aiñ dei ban kheiñ be-aiñ bad ban kyndang mardor ïa ki. Ka jingkyndang ïa ki nongsah be-aiñ ka dei kaba jia ha baroh kawei ka Ri India la phi phai sha Assam, wat ha Chandigarh ne kiwei kiwei ki Jylla. Hangne ha Meghalay ruh, lada phi peit ïa ki Nongshongdukan madan, ki ju shah kyndang beit hynrei kam mut pat ba kin buh ïa ki jingdawa ba ka Sorkar ka dei ban pynshna dukan ïa ki, hap bei ïa ka jinglut jingsep, phi dei ban ai jaka”.
Haba pynpaw ba ka Harijan Panchayat Committee kala ap kum ka ‘Khun Khatduh” kaba ïoh pateng ïa ka hok nongkynti ki Khasi, u samla Donald ula pynkynmaw da kaba ong “Kim dei ki trai shnong, ki dei ki poiwir bad katto katne ki dei kiba buhai be-aiñ”.
“Ngi don ruh ka khubor ïa kito ki kynhun ne ki Seng kiba wan na kylleng ki Ri ka Pyrthei bad ruh ka Ri India ban tuklar ïa ki kam hapoh ka Jylla, ba lada ki sngewkhia haduh katta katta ïa kine ki briew, sngewbha ïalam noh ïa ki sha ki jaka ba ki wan, ai ha ki ïa ki jaka, ai ha ki mar 2000 lane 3000 sqft, pynshna ïing ïa ki hynrei ki dei pat ban leh shabar jong ka Jylla Meghalaya. Lada ki leh ïa kane, ngin da iaroh ïa ki” ula ong.
Halor ka jingkam trai ka HPC ïa ka jaka ha Them Iew Mawlong, une u Nongïalam ka KSU ula ong “Ka HPC kam shym la ïoh syrnot na u Syiem ka Hima Mylliem. Kane ka jaka ka hap hapoh ka Sixth Schedule, phi donkam ïa ka syrnot, phi dei ban ïoh ïa ka certificate na ka Shnong. Lada ki kam trai ïa kane ka jaka ki dei ban pynshisha mynno ba ki thied ïa kane ka jaka bad kumno ba ki ïoh ban thied ïa kane ka jaka kaba hap hapoh ka Sixth Schedule”.
