Khliehriat, Jymmang 28: Ki pulit jong ka Umkiang Patrolling Post, mynta ka jan miet ki la ioh bat ïa ki ar tylli ki kali kiba wan na ki thaiñ Assam, kiba kit ganja (Marijuana) bad la kem noh ïa ki ar ngut kiba donkti, ha ka por 3 baje ki la ioh kurup ïa u ganja ba khia 57.828 kilo bad ha ka por 6 baje jan miet ki la kurup biang 31.142 kilo u ganja.
Katkum ka jingpyllait khubor u Additional Superintendent of police East Jaiñtia Hills District, u bah Banraplang Jyrwa, MCS, la ong ba ha ka por 3 baje mynta janmiet, ki pulit ki la ioh bat ïa kawei ka kali santro, kaba don u registration number AS-06-J- 5971, ha Damcherra, ha Umkiang, la ong ba katei ka kali ka la wan na Assam bad kiew sha Khliehriat, katba ki pulit ki dang pynsangeh ïa ka kali uwei uba shonglang ha katei ka kali u la ioh ban phet krad noh na kti ki pulit,.
Haba la pynlong ïa ka jingkhynra, ki pulit ki la lap ïa ki song ganja bad hadien ba la dep test la pynshisha ba ki dei ki ganja ba ju tip kum u Marijuana uba don 57.828 kilo, ha kaba iadei bad kane ki pulit ki la bat noh ïa u Alajit Debbarma, 24 snem kyrta, uba na ka shnong Noya Bari, Gram, Baikunthapur, District West Tripura, la kurup noh ruh ïa katei ka kali, ïa ka ejahar la regiter ha Lumshnong Police Station bad pynngat hapoh ki kyndon aiñ jong ka NDPS Act.
Ha kane ka juh hi ka sngi, ha ka por 6 baje janmiet, ki pulit Umkiang, ki la ioh bat sa kawei ka kali kaba don u registration number AS-01-AT- 6157, kaba dang wan na Assan bad kiew sha Khliehriat, na kane ka kali ki pulit ki la ioh kurup ïa u ganja (Marijuana) uba don 31.142 kilo.Ha kaba iadei bad kane ki pulit ki la kem noh ïa u Pabitra Debbarma, 36 snem kyrta, uba na ka shnong Kumarribill, West Tripura bad la kurup noh ïa u ganja, ïa ka kali, kawei ka mobile phone, kawei ka RC bad kawei ka Pan Card.
Ia ka ejahar la register ha Lumshnong Police Station hapoh ki kyndon aiñ jong ka NDPS Act
Ki pulit ki dang pynlong ïa ka jingtohkit ban lap shuh shuh ïa kiba donkti ha kane ka jingkhaii ganja.
