Ym dei ka jylla ban myntoi na ka jingpynbeit pud dei ki riew shimet, ong u Bah Pala

By Mawphor Editor On Apr 26, 2022

Shillong, Ïaiong 25 : U President ka Meghalaya Pradesh Congress Committee (MPCC), Bah Vincent H Pala ha ka sngi Nyngkong u la kynnoh ba ka jingsoi jong ka sorkar MDA ïa ka MoU na bynta ban pynbeit pud ha ki hynriew tylli ki jaka khappud kam dei satia na bynta ka jingmyntoi jong ka jylla.
“Lada ka jingpynbeit pud kam dei na ka bynta ka jingmyntoi jong ka jylla, ka la dei beit na ka bynta ka jingmyntoi jongno re,” ong u Bah Pala haba kren bad ki lad pathai khubor haba kren halor ki jingïakhih kiba bun kiba mih hadien ka jingïasoi ïa ka MoU hapdeng ka Meghalaya bad Assam ha nongbah Delhi ha ka 29tarik u Lber.
La kynnoh ruh ba ki don ki heh spah ha ka sorkar kiba la thied ïa ka five-star hotel ha Khanapara. “Hynrei hadien ba ki lap ba ki kot khyndew ki dei na Meghalaya katba ka jingbit ban tei iing pat hap ban ïoh na Assam, kumta ka la buh jingeh ïa ki,” u la bynrap biang.
Katkum ka jingong jong u, ïa kane la leh hadien ba u Myntri Rangbah ka Jylla, Conrad K Sangma u la weng noh ïa u MLA ka Mylliem kum u Myntri ka tnad Urban Affairs.
Ha kajuh ka por, u Bah Pala u la buh jingkylli ruh ïa ka jingbym kynthup lang jong ka sorkar naduh ka KHADC haduh kito kiba don bynta ha kitei ki jaka ha shwa ba kan soi ïa ka MoU.
Da kaba kynthoh ba katei ka jingsoi MoU kadei kaba beaiñ, utei u heh Congress uba dei ruh u MP ka Lok Sabha u la ong, “Haba don ka jingsoi ïa ka MoU lane ka soskular die ban da don ki sakhi hynrei ha katei ka MoU ym shym la don satia ki sakhi. Kaba ar pat ka long ba lada katei ka MoU kadei na bynta ka jingmyntoi ki paidbah la kumno kumno u Syiem lane ka Dorbar lane ka District Council dei ban khot lang. Kaei ka jingeh ba khlem khot lang ïa ki?” u la buh jingkylli.
Halor kine, u Bah Pala u la ong ba kane ka sorkar ha ka jaka ba kan weng ïa ki jingeh ka la nang pynjur shuh shuh ki jingkulmar.
“Haba phi pynbeit ïa ki jingeh kiba la don mynta la palat 60 ne 70 snem kaei ka jingeh ban pynlut por sa 10 ne 15 sngi ban ïa syllok bad ki paidbah ha kito ki thaiñ. Lada ki paidbah kim sngewtynnad balei pat phi pynmih shuh shuh ki jingeh na ka jingeh ba la don lypa? Lada phim lah ban weng ïa ki jingeh ieh noh ha ka pateng ban wan ba kin leh, ym dei satia ban thaw bad pynjur shuh shuh ïa ki jingeh na ki jingeh ba la don lypa,” u la ong.