Nongstoiñ, Jymmang 01: Ka jingbym treikam shuh jong u tower mobile phone ba la pynïeng da ka Bharat Sanchar Nigam Limited ha ki thaiñ Sangriang la bun bun bnai, ka la wanrah jingeh haduh katta katta ïa ki paitbah. Kumta na ka liang ki nongïalam ka Federation of Khasi Jaiñtia and Garo People Greater Nongkhnum circle, mynta ka sngi ki la leit ban ïakynduh ïa u Sub Divisional Engineer jong katei ka tnad treikam ha Nongstoiñ, ban kyrpad ïa u ba um phah pynbiang noh ïa utei u tower.
U bah Ïoanis Ïawlar secretary ka seng haba ïakren bad u nongthoh khubor, u la ong ba ha kine ki bnai ba la dep ki la leit ban ïakynduh ïa ki nongtrei katei ka tnad. Hynrei haduh mynta kim shym la leh ei ei, kumta ha kane ka sien kaba ar na ka liang ka seng ryngkat ka jingïatreilang bad ki nongsynshar shnong, ki paitbah ka thaiñ lem bad kiwei kiwei ki sengbhalang, kim banse ban leit ïakynduh ïa utei u heh jong katei ka tnad bad ki la aiti ruh da ka dorkhast, khnang ba un peit lem ïa katei ka jingeh.
Nalor kata u la ong ruh ba ka jingbym treikam jong utei u tower, ka long ka jingduh kaba khraw ïa ki nongpyndonkam mobile phone ha katei ka thaiñ, khamtam ha ki por ba ki don ki kam ba kyrkieh kum kaba pyntip ïa ki jingjia bad ki jingdonkam jong ki bapang ba shitom sha ka 108, lane ka jingpluh ïing sha ka Fire Service bad kiwei kiwei.
