Nongstoiñ, Ïaiong 25: Ka Basketball Association of West Khasi Hills, kan pynkut lane pynhap pyrda noh ïa ka lympung 1st Inter School Basketball Tournament ha ka sngi ba ar jong ka taiew.
Na ka liang u President ka Association Bah Donald Nongsiang, u la iathuh ba ki kynhun ki ban ïakhun ban rah ïa ka nam lahduh, ki long na ka liang ki kynthei, ka St Francis HSS pyrshah ïa ka St Peter’s HSS ha ka por 11 baje. Katba na ka liang ki shynrang ka jingïaknieh nam lahduh kan long hapdeng ka Christ King HSS pyrshah ïa ka Anderson HSS ha ka por 12:30 shiteng sngi.
Ha kane ka sngi, u kongsan u ban don ryngkat bad ai mynsiem bad pynshit pynshngaiñ u dei u Bah Eugeneson Lyngdoh MLA ba don burom ka ïing dorbar thaw aiñ ka Jylla bad nongmihkhmat ka Mawphlang Constituency.
