Shillong, Ïaiong 24 : Ki nongshong shnong jong ka Pomlum, 7 Mer Upper Shillong ha ka sngi Saitjaiñ ki la pynpaw ïa ka jingkmen kaba khraw namar kadei hadien bun bun snem ba la urlong ka jingangnud jongki ban ïoh noh ïa ka surok rong kaba bha.
Ïa katei ka surok rong ba 0.978 kilometer ba la shna ha ka jinglut kaba 45lak tyngka la wan ban plie paidbah da u MLA ka thaiñ ba dei ruh u Myntri ka tnad C&RD, Bah Hamlet Dohling ha ryngkat ka jingdonlang ki nongïalam shnong bad ruh ki paidbah nongshong shnong.
Haba kren ha katei ka jingïalang, u Bah Hamlet u la pynpaw ïa ka jingkmen halor ka jinglah jong ki kontraktor ban pyndep ïa ka ha ka por kaba biang. U pynpaw ruh ïa ka jingkyrmen ba ka jingdon jong katei ka surok ym tang ba kan pynsuk ïa ki nongshong shnong ha ka leit ka wan hynrei kan ïarap ruh ban kyntiew wat ïa ka ïoh ka kot bad ka kamai kajih jongki man la ka sngi.
Na ka liang u Rangbah Shnong, Bah A Lyngdoh u la ïathuh ba katei kadei ka sngi kaba khraw tam ha ka shnong namar katei ka surok ka la sniew shaba palat la slem bha. Da kaba ai ka jingïaroh ïa ka jingshimkhia jong u MLA bad ka jingbuddien jong u ba ka kam kan dep kloi, u Rangbah Shnong u la ong katei ka pyni ïa ka mynsiem trei jong ki nongmihkhmat na bynta ka bit ka biang jong ki paidbah ka constituency.
