H a kane ka jylla Meghalaya ïa kaba la tip kum ka matrilineal society lane ka jaitbynriew ha kaba ki khun ki shim jait na ka kmie, ha man ba pynlong kino kino ki jingïalang paidbah (lait noh kito kiba pynlong da ki seng kynthei), ym ju kham ïohi bad ïohsngew ba ki kynthei kin kren bad pynsngew paidbah ïa kaei kaei kaba ki don ha ka jingmut jingpyrkhat jong ki. Tip balei ba ki kynthei kim shlan ban kren ïa kaei kaba ki sngew. Lehse ka jingkren ki riew hyndai ba, “ynda lah kynih ka ‘iar kynthei ka pyrthei ruh ka la jan wai.” Kane ka jingkren pharshi ka thew sha kiba bun ki bynta kiba dei ban ïatai bha. Kane kam dei shuh ka juk hyndai ha kaba ïa ki kynthei bad longkmie la shu rai beit ba ki dei ban don ha ïing shet ja bad ban pynbiang ka bam ka dih na ka bynta ka ïing ka sem baroh kawei, nalor ka khlieng ka sait; ka saitjaiñ sait nep bad ka sumar khun. Ka kam u rangbah la rai beit ba ka dei ka kam ban kamai na ka bynta ban pynbit pynbiang ïa ki jingdonkam ha ïing ka sem.
Mynta ngi don ha ka spah snem kaba arphew wei (21st century) ha kaba ki kynthei ki ïakot ka bor pyrkhat bad u rangbah; ki trei ïa ki kam engineer, doktor, ki nos, ki nonghikai skul bad kolej; ki ophisar ha ki ophis sorkar bad ha ki kompeni bapher bapher. Ki kynthei ki ïashim bynta ruh ha ka kam saiñ pyrthei bad ki long ruh ki myntri sorkar. Namarkata ki kynthei ha kane ka juk ki don la ka jong ka bor bad ka iktiar. Hynrei haba phai sha ki seng bapher bapher kum ka seng ki samla pule ne kiwei pat ki seng trei mon sngewbha ym ju kham ïohsngew ba ki kynthei kin long ki nongkitkam kum ki President ne ki Secretary. Hato ki kynthei kim long kiba bit ne kiba tbit ban long nongïalam ïa kiwei pat ki seng khleh lait noh tang ïa ki seng kynthei? Mano ba bsuh ïa kum kine ki jingsngew ha ngi?
Sa kawei ruh ngi ngeit skhem lada shimti bad ïalam ki kynthei ïaka synshar khadar khlem pep kan kham duna ka jingbamsap namar ha ki kynthei ka dang don ka jingïatip lem hynrei kumba long mynta te ha ki rangbah te imat kata ka mynsiem ïatip lem ruh ka la jah noh. Balei ba ong kumta, lada phi phai ha ka jylla ne ha ka ri hi baroh kawei bunsien kiba ngat ha ki kam bamsap ki dei beit ki rangbah ki kynthei te dang kham niar shisha.
Ym dei tang ha ka synshar ka khadar hynrei lada dei ha kino kino ki kam ruh lada bishar bniah kiba peit bad ïalam da ki kynthei ki kham pher bad ïaid beit ïaid ryntih shisha la ka dei ha ki kam Balang, ki kam imlang sahlang, ki kam trei mon sngewbha bad ter ter.
Bunsien haba don ki jingkhot khamtam lei lei kiba dei na ka liang sorkar la ju ïohi ba ka dap ka kamra tang da ki rangbah suda.Ka por ka la poi ba lada ngi ki longkmie ngi sngew sarong ban ong ba ngi long kita ki nongrim bakhlaiñ jong ka imlang sahlang te ngi dei ruh ban shim ïa ka jingkitkhlieh bad pynkhuid lem ïa ka mei mariang kaba kynthup ïa ki wah bad ki lynti ki syngkien. Lehse lada pynkup bor ïa ki longkmie ha man la ki dong ba kin long ki nongpeit pyrman ïoh don ba bret ñiut thurmur bad ban kem ïa kum kita khnang ba kin hap siew da ka phaiñ kan bha shibun eh.
Ki kynthei bad longkmie kim dei shuh ban long tang ki nongsngap kiba shu wan jingïalang hynrei ki bym khlem kren ei ei ruh. Ki dei ban pyndonkam ïa la ka iktiar ban peit ba kiwei ki para kynthei kin ïashim bynta ha ka ban peitngor ïoh don ki riew shim kabu kiba bret ñiut ha ki wah ha ka jaka ban leit bret ha ki trok kit ñiut. Lada kawei pa kawei ka longkmie ka phikir bad sdang na la ïing ban ym bret pathar ïa u ñiut, nga ngeit ba kane ka sor Shillong bad ki wah jong ka kin khie-im biang sa shisien.
Nga kyntu ruh ïa ki para longkmie bad ki kynthei ba phin ïa long kiba shimti kam ha shnong ha thaw. Ngi dei ban ïatrei ryngkat ryngkat bad ki rangbah namar ma mangi ngim dei shuh kita kiba tang shibor.
Hooid kam mut ban ong ba ki kynthei kin ïaid lait na u Rangbah ne ba kin ym kheiñ snep shuh ïa u rangbah hynrei kaba kongsan ka long ban burom ïa ka iktiar jong u Rangbah hynrei ha kajuh pat ka por ban ïatrei lang ruh ha kino kino ki kam na ka bynta ban tei ïa ka imlang ka sahlang bad ïa ka ri bad ka jaidbynriew.
Kum mynta ba jur bha kane ka jingïa kynad halor ka jingpyntreikam ïa ka Roster System ha ka jylla lehse ka donkam ïa ki longkmie ban wan shakhmat bad ïatrei lang namar ka jingai jingmut jong ki kruh ka long kaba donkam bha namar kane ka kam ka long kaba khia haduh katta katta lada bakla shim rai tang tiak tang katta ka la ktah ïa ka jingsngew jong ki jaidbynriew ha ka jylla. Ban da dei ba ka ïing bishar ka pdiang naduh kaba sdang ïa ka jingtyrwa ka sorkar ban pyntreikam naduh nangne shakhmat katta ym don jingpher hynrei namar ba khlem ailad ka ïing bishar bad ba ka sorkar ka pyntreikam naduh u snem 1972 mynta sa mih kine ki kynrum kynram bad jyrwit jyrwat bad ha kum kane ka por donkam ruh ïa ki longkmie ban ïa ai jingmut lem halor kane kakam.
