Ka jingdawa pynkylla ïa ka Reservation Policy kan buh jingma ïoh kan khring ïa ka kashari ban tuklar: HNYF

Shillong, Ïaïong, 12: Ka Hynniewtrep National Youth Front (HNYF) ha ka sngi Ba-ar ka la pypaw ba ka jingdawa ban peit biang bad pynkylla ïa ka Reservation Policy kan buh jingma pynban ïoh kan khring ïa ki bor ka kashari lada dei ïa ka Supreme Court ne High Court ban tuklar ïa kane ka kam.
Haba kren sha ki lad pathai khubor u President ka HNYF u Bah Sadon Blah u la ong ba ka jingdawa pynkylla ïa ka Reservation Policy kan buh jingma namar lada pynkylla kumba dawa lehse kan khring ïa ka court ban peit bniah ïa ka Reservation Policy.
“Kat kum kiba bun hi ki rai bishar ka Supreme Court ka kdew ba ka jingbhah ïa ki kam ki jam kam dei satia ban palat ïa 50% hynrei lada dawa pynkylla bad ka urlong kane ka jingdawa ka lah ban khring pynban ïa ka kashari ban tuklar ïa kane ka kam namar ha ka bhah thungkam thungjam ka jylla ka bhah kam ka la palat ïa ka 50% namar la bhah 40% ïa u Khasi, 40% ïa u Garo, 5% ïa ki OBC bad kiwei pat ki jaidbynriew riewlum bad ki Schedule Caste bad ïoh lehse ka court kan pynmih hukum na kaba pynshong nongrim na ki rai bishar ka Supreme Court,” ong u Bah Sadon.
“Kat kum ka riti synshar ki Reservation Policy ka dei tang na bynta 10 snem, lehse lada wanrah da ka aiñ halor kane ka bynta kan khring ïa ka kashari bad ki jingmih na ka hukum jong ka kin ktah shibun shah ban ïa ki jingïoh jingmyntoi,” u la bynrap.
Haba kren halor ka jingpyntreikam ka sorkar ïa ka Roster System da kaba ka kyrtiang shaduh u 1972, u Bah Sadon Blah u la ong ba ha ka jingshisha ka sorkar kam dei ban kyrtiang dien shaduh u snem 1972 hynrei dei ban pyntreikam beit shakhmat naduh ba la mynjur.
U la ong ruh ba kat kum ka hukum ka Meghalaya High Court kam shym la bthah ba ka jingpyntreikam ïa ka Roster ka dei ban phaidien shaduh u 1972.