Shillong, Ïaïong 12: Ka Harijan Panchayat Committee (HPC) ha ka sngi Balang ka la pynpaw ba kat haduh mynta ki dang ap ïa ka sorkar jylla ban khot ïakren ïa ki halor ka jingthmu jong ka ban pynkynriah noh ïa ki 342 tylli ki longïing ki Harijan kiba sah ha Them Iew Mawlong.
“Ngi dang ap haduh mynta ïa ka sorkar ba kan khot ïakren ïa ngi halor kane ka mat,” ong u Secreatry ka HPC u Gurjit Singh,
Haba kylli la ka HPC ka la dep jubab ne em ïa ka Blue Print kaba ka sorkar ka la phah na ka liang u Gurjit Singh u la kyntait ban ïathuh halor kane ka mat.
Na ka liang u Symbud Myntri Rangbah ka jylla u Bah Prestone Tynsong u la pyntip ba na ka liang ka sorkar kan sa khot noh shen ïa ka jingïalang ïa ka HPC ban pynsngew ïa ka jingthmu ka sorkar bad ban sngap ruh ïa ka jingmut kaba don na ka liang jong ki.
“Ngi dang ap ïa u Symbud Myntri Rangbah ka jylla ba dei peit ïa ka tnat pynroi sor ka sorkar jylla ba un wanphai sha Shillong bad la kumno kumno ha une hi u bnai ka jingïalang yn sa lum noh,” ong u Bah Prestone.
U Bah Prestone u la ong ba na ka liang jong u um pat shym la ioh jingtip la ka HPC ka la jubab ne em ïa ka jingtyrwa kaba ka sorkar ka la ai lyngba ka tnat ki kam pynroi sor halor ka jingthmu jong ka ban pynkynriah noh ïa ki na kane ka jaka.
Lah ban kdew ba ha ka 16 tarik u Lber ka sorkar jylla ka la aipor haduh ka 10 tarik Ïaïong ïa ka HPC ba kan jubab ïa ka jingtyrwa jong ka ban pynkynriah na Them Iew Mawlong sha ka jaka ba ju don ka ophis ka to Shillong Municipal Board (SMB).
Ka sorkar ka la kyntait ruh ïa ka jingpan por ka HPC da lai bnai na bynta ban jubab ïa ka jingtyrwa kaba ka sorkar ka la ai sha ki.
Lah ruh ban kdew ba ka Meghalaya High Court ha ka 16 Rymphang ka la bthah ïa ka sorkar jylla ban pynkut noh syndon ïa kane ka kynrum kynram tang shu kut ka elekshon.
Ha la 29 tarik Nailur jong u snem ba la dep ka sorkar ka la aiti ïa ka blueprint sha ka HPC ha kaba ïadei bad ka jingthmu jong ka ban tei ïa ki paki dulan bun mala na bynta ban pynkynriah ïa ki 342 tylli ki long ïing ba sah ha Them Iew Mawlong.
Ka sorkar jylla ka la kyntait tuh ïa ka jingtyrwa ka HPC ha ka 25 Ïaïong 2022 ba ka sorkar kan ai 200 square meter ka kyndew ïa man kawei pa kawei ka longïing ha ka jaka ba hap hapoh European ward nalor ba ka dei bam tip ïa ka bailut bai sep ban shna ïing ïa baroh 342 tylli ki longïing.
