Kynnoh shna aiñ hi ki Nongïalam Shnong Sohmynting ïaka JHADC halor ka kam jied Waheh Shnong

Jowai, Ïaïong 21: Ka long ka khubor kaba ym juh kham ïohsngew koit haduh mynta mynne ba ka Jaiñtia Hills Autonomous District Council (JHADC) kaba dei ka bor ba hakhlieh duh ban peit ïaka synshar khadar ba ïadei bad ka aiñ Dolloi ka aiñ Waheh Shnong kan shah ïuhroit ha ki katto katne ngut ki riew madan kiba la shim ïaka bor ha kti khlem ka raiñ ka rem kata ba ïaka aiñ Waheh Shnong ba dei ka nongkynti ka JHADC kila tuklar bad shna da ma ki.
Kane kala jia ha shnong Sohmynting, West Jaiñtia Hills District ha kaba u Lephing Pyrtuh kum u Waheh Shnong bala jop da ka jingïajied (election) thep vote pyrshah ïa u Bravestar Phawa haka 13 tarik September 2019, ryngkat ka jingsakhi ki bor ka JHADC bad u Dolloi ka Elaka Amwi ula leh pyrshah kylla ïaka Council bad ïa kiwei pat ki jait kur ha Sohmynting tang mar shu shah jied, kata da kaba thoh sop sop haka Constitution ka Dorbar Shnong Sohmynting kaba u register ha ophis u Deputy Commissioner, Joint Registrar of Societies, WJH, ba dei tang ka jait kur Pyrtuh kaba lah ban jied ne long Waheh Shnong ha Sohmynting.
Ïa kane la lap haka jingthoh “lamphrang jong ka Constitution” kumjuh ruh haka “Article VIII (A)” jong ka Constitution kaba la ïoh lyngba ka RTI, bala donkti lang ruh ban soi da u Ling Pyrtuh, u Mynjurlang Lyngdoh, u Ebormi S Langshiang, u Treyoo Phawa, u Early Suting bad u Spar Rasmut.
Napdeng kine ki nongïalam shnong dei kiba la nang la stad, hynrei ym tip halor kaei ka nongrim ki nud ban leh beaiñ kumne, namar nalor ba kane ka long pyrshah ïaka aiñ jied Waheh Shnong ka JHADC katkum ka aiñ “The Jaiñtia Hills Autonomous District (Establishment of Elaka and Village and Election, Appointment, Powers, Functions and Jurisdiction of Dolloi/Sirdar and Waheh Shnong) Act, 2015”, ka long pyrshah ruh ïaka aiñ jong ka ri India katkum ka (Indian Constitution Article 15).
Ha kajuh ka por wat ka Kur Pyrtuh Sohmynting ruh haka Constitution jong ka kam shym la kubur ei ei ba dei tang maka ba lah ban jied ne long Waheh Shnong kumba la kam da kine ki nongïalam shnong.
Ka jingkylli ka mih hato haka shnong Sohmynting lada dei ba jop election Waheh Shnong da uno uno u jait kur uta ruh un kam ba dei tang ka jait kur jong u ba lah ban long ne jied Waheh Shnong?.
Haka Constitution, la lap ruh ba kitei ki nongïalam shnong kila kam ruh baka Sohmynting dei ka shnong jong ka kur Pyrtuh ne ka Hima ka kur Pyrtuh kaba don la ki pud ki sam kynthup u Moospong, Mootari, Myngkoi Lum, Wahtyr-a, Lum Syntung, Madam Pynthor, Lum Syrpad, Wahlakyndang, Wah Ummuchai bad shilynter ka Wah Umngot (Naduh Wai Dum haduh Chkah Wah Tyr-a), hynrei kine ki jingthoh baroh ki long kiba bakla, namar katkum ki kot ki sla bala register ha District Council dei haka kyrteng ka Dorbar Shnong ym haka Kur Pyrtuh.
Shuh shuh haka Constitution kila kam ruh ba dei ka kur Pyrtuh ba pynïaid ïaka synshar khadar ka shnong Sohmynting haduh mynta, katba kiwei pat ki jait kur ki ngeit bad shañiah namar dei maka ba ai jaka ïaki paidbah nongshong shnong, hynrei katkum ka jingshisha hi dei ka shnong kaba juh ai jaka ïa u duk u suk hapoh ka shnong ka thaw.
Haoid la sngewthuh, ba donkam hi ïaka shnong ban shna ïaka Constitution naka bynta ki jingmyntoi hapoh ka shnong ka thaw, hynrei ban pynrung pat hapoh ka Constitution ïa kiba kum kine ki jait jingthoh ba ktah ïaka longbriew manbriew ka long ka bym lah satia ban pdiang. Pynkut ka kyrwoh na u ma Laribha Kyndait bad u ma Wailad Suting kiba dei ki nongshong shnong Sohmynting.