Shillong, Ïaïong 20 : Ka People’s Democratic Front (PDF) kawei na ki party ba donlang ha ka sorkar synrop jong ka MDA ka la ong ba ki pyrshah jur ban pynbor hikai ïa ka Hindi ha ki skul kiba don ha ka jylla.
Haba kren bad ki lad pathai khubor, u President ka PDF, Bah Banteidor Lyngdoh u la ong hadien ba ki la ïohi ïa ka jingkren ba la ai da u Myntri ka tnad Kampohïing ka Ri ban pynlong compulsory noh ïa ka ktien Hindi ha ki skul, mardor ki la ïa kren ïa katei ka mat ha ka party ha kaba baroh ki la pynpaw ba kim sngew ïahap satia.
“Shen ngin sa leit ban kynduh ïa u Myntri Rangbah ka jylla ban ïa kren halor kane, bad tang shu wan ma u ngin sa ïoh ban ïa kren khnang ban shai namar ngi don lang ha ka sorkar ngi donkam ban ïa shai na ka bynta ka jingmyntoi jong ki nongshong shnong jong ka jylla jongngi,” u la ong da kaba pynpaw ba ka nongrim ba ka party ka ieng ka long ba kin ieng pyrshah beit namar ki don ka jingsyier ba lada jah ka ktien ka la jah ka Jaidbynriew ruh.
Da kaba banjur ba la donkam shwa ban ai noh ka jingithuh noh shwa ïa ka ktien Khasi ha ka Khyrnit kaba Phra ban pynriewspah shuh shuh ïa ka ha ka jylla, u Bah Banteidor uba dei ruh u Myntri ka tnad Sports jong ka sorkar jylla u la ong ba ka don ruh ka jingmyntoi lada nang ban kren bun ki kyntien.
“Ym dei eh tang ban nang kren Hindi, hynrei lada nang bun ki jait ktien lei lei kadei ka jingkyrkhu bad jingmyntoi haba leit shano shano. Haba phi leit sha Assam bad phi nang kren Assamese kan pynsuk ïa phi bad haba phi leit sha Manipur bad phi nang kren Manipuri kan ïarap ïa phi bad lada phi leit sha Delhi bad phi nang ban kren Hindi kan pynsuk ïaphi. Kumta kano kano ka ktien lada phi nang kan pynmyntoi ïaphi. Tangba ban pynbor pat ba phi hap kren ïa kane ka ktien te ka bym lah long,” u la bynrap shuh shuh.
