Mynjur ka Kynhun Myntri ban rah da ka Bill ha Assembly ban pyndam noh ïa ka aiñ Khalai

Shillong, Lber, 09: Ka Sorkar Meghalaya Democratic Alliance (MDA-II) ha ka jingïalang banyngkong eh jong ka Kynhun Myntri kaba la long ha ka sngi Palei ka la mynjur ban rah da ka Aiñ-Rew ha Iingdorbar Thawaiñ ka Jylla ban pyndam noh ïa ka Meghalaya Regulation of Gaming Act, 2021, kaba la mih bha ka jingpyrshah na ki paidbah, ha ka Dorbar Mang Tyngka jong ka Iingdorbar Thawaiñ ka ban sa long naduh ka 20 tarik u Lber, 2023.
Ka jingïalang jong ka Kynhun Myntri ba la pynïaid da u Myntri Rangbah ka Jylla u Conrad Kongkal Sangma ka la jied ruh ïa ki ngut ki nongaiktien jong ka Sorkar, kiba kynthup ïa ka Dr. M. Ampareen Lyngdoh, u Bah Paul Lyngdoh bad u Marcuise N. Marak.
Baroh ki Myntri Sorkar ki la ïashim bynta ha kane ka jingïalang watla u Myntri Rangbah um pat sam satia ïa ka bhah kaba ki dei ban ïoh.
“Kumba phi tip ngi la mynjur da ka Ordinance ban pyndam noh ïa ka Meghalaya Regulation of Gaming Act, 2021. Mynt ka sngi, katba ka sien shong dorbar ka la hajan, ngi la wanrah ïa ka Bill, khnang ba yn dup lah ban pyndam noh ïa ka Meghalaya Regulation of Gaming Act will be repealed,” ong u Sangma ha ka jingïakren bad ki lad pathai khubor.
Haba kylli, u Myntri Rangbah u la ong ba la shu pyntreikam da ka Ordinance kaba ladep mynjur katba ym pat lah satia ban pynlong ïa ka Dorbar jong ka Iingdorbar Thawaiñ. “Mynta haba ka sien shong dorbar ka la wan biang ngin sa rah da ka Aiñ-Rew ban pyndam noh ïa ka Meghalaya Regulation of Gaming Act, 2021,” u la ong.
Lah ban kdew hangne, ba ka Sorkar ka la shim ïa ka rai ban pyndam noh ïa ka aiñ khalai hadien ba ka la mih ka jingpyrshah kabajur na kiba bun ki liang khamtam eh na ki nongïalam Niam bad na ki kynhun bapher bapher.
U Sangma u la ïathuh ruh ba ka Kynhun Myntri ka la mynjur ruh ïa ka Contingency Fund of Meghalaya (Amendment) Bill, 2023.
Ha kaba ïadei bad ka mang tyngka bapura, u Myntri Rangbah u la ong ba yn sa mynjur ha ka Dorbar Mang Tyngka ka ban sa long shen bad bynrap ba ka Business Advisory Committee (BAC) kan sa shong ha ka Lah Sngi u Blei jong ka taiew ban wan na ka bynta ban buh sngi..
“Lada ngi leit tang na ka bynta ka Vote on Account yn lah ban mang ïa ka pisa tang na ka bynta lai bnai bad ngin hap ban ïakynduh bïang bad ka mang tyngka bapura kan ym long satia. Ka kynhun ka la trei shitom ha ki bnai baladep ban pyndep ïa ka mang tyngka kaba pura shwa ban sdang ka eleksohn. Namarkata, ka tnat Pla Tyngka ka ladep pynkhreh nadong shadong bad ka mang tyngka bapura,” u la ong.