Shillong, Lber, 09: U Myntri ka Sorkar Jylla u Bah Paul Lyngdoh uba long ruh u nongïalam jong ka UDP ha ka sngi Palei u la ong ba donkam ïa ki Seng Riewlum ban khlieh biang sa shisien pat.
U Bah Paul u la pynpaw ïa kane hadien ka jingpyrshang jong ki seng riewlum ban thaw ïa ka sorkar kaba kim shym la lah ban pynurlong.
“Ngi donkam ban khie khlieh bad ngi donkam ban pyndep bha ïa la ka kamram. Ngi la phiel namar ba jingïatylli ka long kaba tlot, namarkata ki don ki jinghikai kiba ngi dei ban tip bad ngi ladep tip,” ong u Bah Paul.
Haba kylli, hato ka jingphohsniew jong u President ba la khladnoh ka UDP u Dr. Donkupar Roy ka la urlong neem, u Bah Paul u la ong, “ka don ka jingong hapdeng kaei kaba ladep ong bad leh, kaba kham kren bun bad kaba leh duna bad nga tharai ngi hap ban pyrshang ban trei, ban buh thong, ban phaidien biang bad khang ba ngin dup lah ban khie khlieh sa shisien pat.”
Ka UDP ka don 11 ngut ki MLA ha ka Ingdorbar Thawaiñ kaba dang shu dep jied ïa ki 59 ngut ki Nongmihkhmat kiba thymmai.
