Syllad ka ‘erïong bad u phria ïa 4 tylli ki ïing bad kawei ka dukan ha Domsohkhai, Nongnah

Mawkyrwat, Ïaïong, 17: Hadien ka jingwan jong ka lyer kaba jur ha ryngkat u phria hynnin ka shiteng jong ka miet kaba la dei ha ka sngi U Blei, ka la jia kawei ka jingjia ha kaba ka lyer ka la khyrwit bad rad ïa saw tylli ki ïing bad kynthup de ïa kawei tylli ka dukan hapoh jong ka Shnong Domsohkhai, Nongnah, South West Khasi Hills District.
Ka tyllong khubor na u Secretary Shnong Domsohkhai Nongnah, u bah Kyrmen Kharryja u la ong ba ka jingwan jong ka lyer kaba ka dei ha ki por kumba 1 baje ei ei jong ka step Sngi U Blei ha kaba ka lyer, u slap ryngkat bad u phria ki la wan lynshop bad la rong bad rad ïa ki katto katne ki ïing ba ki briew ki shong ki sah.
La ïathuh ba ki 4 tylli ki ïing kiba la shah ktah ki kynthup ïa ka ïing jong u bah Benhavestar Lyngkhoi, kong Diamon Nonglong, bah Oristar Langte bad ka kong Lustida Paliar bad ka dukan jong u bah Kyrmen K. Ryja. Ha kane ka jingjia ym shym la don mano mano ba mynshwa bad na ka bynta ki jingduh-nong jong kitei ki longïing kat haduh mynta ym pat shym la lah ban tip.
Halor kane ka jingjia, u Secretary Shnong Domsohkhai, Nongnah, u bah Kyrmen Kharryja u la ai jingtip ruh ha u Gram Sevak uba dei peit ïa ki shnong kiba hapoh ha ka Ranikor C&RD Block khnang ba un ai sha ki bor ba dei peit kum hapoh ka ophis jong u Block Development Office, Ranikor C&RD Block.