Haduh katno kum ki kmie ki kpa ki dei ban ai ïa ka jinglaitluid ha ki khun hadien ba ki poi sha ka kyrdan jinglong samla

Haba ki khun ki la kynjoh sha ki rta ka jinglong samla, kum ki kmie ki kpa ki dei ban tip ba ka la dei ka por ïa ki ba kin im ka jingim kabalaitluid. Ka dei ruh ka por kaba donkam ïa ki kmie ki kpa ba kin tip kumno ki khun jong ki kin don hapdeng ka jingim kaba laitluid bad kaba pynkmen ïa ki. Ka jingim kaba laitkuid ka ai jingmyntoi shibun ïa ki khun, ka ai jingmyntoi ïa ki kumno ba kin don ka jingkit khlieh, kumno ba kin ïeng hala ki jong ki kjat bad ba kin tip ruh ïa kaba dei bad ïa ka bym dei.
Ka dei ruh ha kum kane ka por ba ki khun kin sngewthuh kumno kin lah ban kyrshan ïalade hadien habud. Ban ai ïa ka jinglaitluid kam dei ba ki kmie ki kpa kin ai lad ba ki khun jong ki kin leh kat kaba ki mon, namar ka lah ban wanrah ïa ka jingma ïa ki bad ki lah ruh ban shim ïa ka jingjied kaba bakla lane ban ïaid ha ka lynti kaba bym dei ha ka jingim jong ki.
haduh katno kum ki kmei ki kap ki dei ban tip ba ki hap ban ai ka jinglaitluid ïa ki khun jong ki ??
Ban ai ïa ka jinglaitluid ïa ki khun ka long ruh kum ka jingpyrkhreh jong ki hadien ba ki la heh la san. Hynrei ka long ruh kaba ju jia baraabor ba ki kmie ki kpa ki lah ban don hapdeng ka jingkulmar jingmut, haduh katno ki dei ban ailad lane ki dei ban ai ka jinglaitluid na ka bynta ki khun jong ki. Kane baroh ka shong ha ki kmie ki kpa, ka shong ruh ha ka jingsngewthuh jong ki khun, ka snem jong ki, ka jingkyrshan kaba ki ïoh na ïing na sem, ka jinglong kit khliejh jong ki bad haka jinglong jong ki. Ka jingai ïa ka jinglaitluid bun ki khun ki ju sngewtynnad ban sdang ïa kiei kiei kiba long thymmai ha ka jingim jong ki la ka dei ha ka jingpule lane ka dei ha kino kino ki kam ruh kumjuh.
Ki don ruh ki khynnah kiba mad ïa ki jingeh ha ki por kiba la leit, bad kim don shuh ka jingshlur lane ka jingshanniah halade, kum kine ki khynnah, ki donkam ïa ka jingïalam bad ka jinglong kaba skhem na ki kmie ki kpa.
Kim don kino kino ki jingbit lane ki aiñ kum ki kmie ki kpa ba ki dei ban buh ïa ki khun shwa ban kin ai lad ïa ki ba kin im ka jingim khlem kano kano ka jingshanniah ha kiwei lane ka jingim kaba laitluid, hynrei ki lah ban don katto katne ki jingjied kiba bakla kum ki kmie ki kpa. Ki katto katne ki jingai jingmut ban lait na kano kano ka jingjied kaba bakla ki long:
Ka rta jong ki
Phi dei ban ailad ïa ki khun jong phi ban leh ïa kino kino ki kam katkum ka rta jong ki. Kum ka nuksa ki khun jong phi haba kim pat kynjoh ïa ka rta kaba 18, phim dei ban shah ba kin ñiah kali namar ka rta jong ki kam pat dei.
Kim dei ban leh ïa kino kino ki kam palat ïa u pud khlem jingsngewthuh
Haba ki khun ki kylli shwa ba kin leh ïa kiei kiei, phi dei ban buh ïa u pud bad ba kim dei ban palat. Kane ka jinglien ka ïarap ïa ki ba kin don ka jingkit khlieh la ka dei ha kano kano ka kam ba ki trei lane ki leh. Kum ka nuksa haba ki kylli ban leit kai bad ki paralok, phi dei ba buh ïa ka por ba ki dei ban poi noh ha ïing bad kim dei ban pynkheiñ ïa kane. ka long ruh kumjuh ha ka pule puthi jong ki, ki dei ban tip ïa ka por ba kin lehkai, peit TV bad ba kin hap ban leh ïa ki homework bad ban pule kot. Haba ki khun jong phi ki pynkheiñ ïa kaei kaba kum ki kmei ki kpa ki buh, ka dei ka por kaba biang ba phin pynbeit bad ban hikai ïa ki, khnang ba kin ym bteng biang ban leh ïa ki juh ki jingbakla hadien habud.
Ka jinglaitluid jong ki ka dei ban don ruh ka jingïadei bad ka jingkit khlieh
Khnang ba ki khun kin tip kumno ban kunai ïa ka pisa, phi dei ban hikai ïa ki ba ka jinglaitluid ka dei ban don ka jingïadei bad ka jingkit khlieh, ai lad ïa ki ba kin trei ïa ki ka ki jam halaïing, ban siew ban tda bad bad kiwei kiwei ki kam. Kane kan ïarap ïa ki ba kin tip ïa ka jingkordor ha ka liang ka pisa bad kin tip ruh ban don ka jingkit khlieh.