Shillong, Iaiong 16 : U nongïalam ka BJP uba dei ruh u myntri ha kane ka sorkar MDA u bah Sanbor Shullai, u la kyrpad ïa ki paid nongshong shnong ka jylla Meghalaya ba kin jied ïa ka BJP ha ka election MLA 2023 da kaba bud ïa ki nuksa jong ki paid Nagaland khnang ban wan ka jingkylla ha ka jylla Meghalaya.
U la ong kiba bun ki paid Khristan ha Nagaland ki la bud ïa ka BJP namar ki ngeit skhem ba dei tang kane ka party kaba lah ban wanrah ïa ka roi ka par jongka jylla. ïa kane ula kren ha ka jingleh burom ïa ki 151 ngut ki trai jaka puta kiba ai sngewbha ïa ka jaka jongki na ka bynta ban shna surok hapoh ka Laban Constituency.
U la ong ki samla na Nagaland kiba trei bad pule kum ha Bangalore, Delhi, Mumbai, West Bengal, Gujarat ki la wan phai mynta sha ka jylla jongki namar ba ki la ïoh kam ioh jam hapoh la ka jongka jylla bad bad ioh ruh ban pule ha la ka jong ka jylla bad kane ka long hadien ba ka BJP ka la jop haduh 12 ngut ki MLA bad ka la ïoh ruh ïa ka shuki Symbud Myntri Rangbah ha katei ka jylla.
“ Naduh ba ka BJP ka la wan ha ka bor ha Nagaland, ka jylla ka la sakhi ïa ki jingpynroi pynpar bad ïoh ïa ka Engineering College, Medical College bad bun ki tnad pule kiba ka Nagaland kan dang ïoh shuh shuh” ong u bah Sanbor.
U la ong ba kane ka pynpaw ba ki paidbah ki la sdang ban shaniah ïa ka party bad pynduh noh ïa kata ka jingsngew ba ka dei ka party ba pyrshah Khristan.
“ Kumta nga kyntu bad kyrpad ïa ki paid nongshong shnong ka jylla ban bud ïa ki dienjat jong ki nongthep vote ka Nagaland bad pynjop don burom ïa ka BJP ha u 2023 khnang ba yn kiew yn roi ka jylla” ong u bah Sanbor.
U la ong ba ki paidbah ka Nagaland ki la kyntait ïa ka jingkynnoh ba ka BJP ka dei ka party kaba pyrshah Khristan namar dang shen ki la pynjop ruh ïa u Phangnon Konyak kum u MP ka BJP sha Rajya Sabha.
Ki paidbah khamtam ki samla ki la ngiah ïa ka jingbang nia bad jingkular jong ki seng saiñ pyrthei kane ka thaiñ ha ka por election bad na kata ka daw ki la sdang ban bud ïa ka BJP. Ki paidbah kane ka thaiñ kum ha Nagaland, Manipur, Assam, Arunachal Pradesh bad Mizoram ki la ngiah shoiñ ïa ki jingkular bad kumta ki la rai mynta ban kyrshan noh ïa ka BJP ong biang u bah Sanbor.
