Ai jinghikai ka Don Bosco Secondary School ia ki khynnah halor ka Indian Classical Dance

Jowai, Rymphang 02: Ki bor pynïaid ka Don Bosco Secondary School, Mookymphad-Mihmyntdu kum shibynta ka jinglehkmen lehburom ïa ka 1stAnnual Day-Indian Classical Dance 2023 ha ka 2tarik February ki la pynlong ka prokram kyrpang ha ryngkat ka jingiadonlang u Terence Sawian kum u kongsan, ka Kong Tina Lakiang kum ka Symbud kongsan nalor ki Sister, ki nonghikai bad ki kmie ki kpa jong ki khynnah.
Ka Sister Maria Joseph kum ban maitphang ka la ai ki kyntien duwai bad ka Agnes Lapasam ka la pashat ki kyntien pdiang burom katba kiwei kiba la kren ai mynsien ïa ki khynnah kumjuh ïa ki bor pynïaid ka skul ki kynthup ïa ka Dr. Snigdha, ka Maria Dominica bad ka Sister Sheela Thomas, Headmistress Don Bosco Secondary School, Mihmyntdu.
Ka kong Tina Lakiang haba ai jingkren ka pynpaw ka jingsngewnguh ia ki Sister kiba la shimkhia ban trei na ka bynta ban kyntiew ia ka pule puthi jong ki khynnah bad ka da kitbok kitrwiang ruh ba ha ki por ki ban sa wan ki don shuh shibun ki khynnah ki ban wan shah hikai na ka bynta kine ki rukom shad ba bna nam ka ri India.
ïa kane ka prokram ai jinghikai shaphang ka Indian Classical Dance la peit bad pynïaid da ka Roshni ba na Jylla Bhopal bad ha ki arbnai jong kane ka prokram ka la trei shitom kat haduh ba ki khynnah ki la lah ban pyni ïa ka sap ka phong jong ki kumno ban shad Kathak bad Bharatnatyam.
U Terence Sawian haba ai jingkren kum u kongsan, u ong ka sur bad ka jingshad ki dei ki dawai ha ka jingim jong ngi ki briew bad ki don ka bor ban ktah bad ktik ïa ka pyrkhat pyrdain bad ka jingsngew jong ki briew kumta ka long kaba donkam ban pynrung ha ka pyrkhat pyrdaiñ ki khynnah skul ïa ka jinglong kyrpang jong kine ki ar tylli.
Ha kane ka sngi la aiti ruh ïa ki Certificate sha baroh ki khynnah ba shah hikai bad ladon ruh ka jingpyni sap shad ki khynnah kumjuh ka jingshad Kathak na ka Roshni balong ka Instructor jong kane ka Classical Dance Training.