Haba la wan ka elekshon, kiba bun ki hiki briew ki ïakren beit shaphang kata ka pisa. Ka khana sharum shaneng, ka jingïakren ha ki lynti ki syngkien, ki dukan, ki jaka paidbah bad kiwei kiwei de ki rynsan ka long ka jingtheh pisa ne ka jingsam pisa ha ka por elekshon.
Lada sngap te baroh baroh ki kren pyrshah ïa ka jingsam pisa ha ka por elekshon khamtam ha ki rynsan ïalap elekshon, ha kaba kiba bun ki ong, “Wat leit bieit haba wan ai ki kyrtong ne wat shah thied kum ki blang ki masi”. La sngew kumba baroh baroh kim sngewdei ban pyndonkam da ka pisa ban khring ïa ki nongthep vote. Hynrei hato baroh ki da mut shisha ne ki shu kren tang ban shu pynpaw ba ki ruh kim kyrshan ne ïahap ban pyndonkam ne ban sam da ka pisa ha ka por elekshon, katba napoh napoh pat kiba bun ki sam pisa ne thied vote da ka pisa.
U Chief Electoral Officer jong ka Meghalaya,u Bah FR Kharkongor, u la ïathuh ba na ki 60 tylli ki Constituency ha ka jylla, ka Election Department, 34 tylli ki Constituency kidei kiban ïakhun da ka pisa ne ki ban pyndonkam da ka pisa. Kane ka paw shai ba ha Meghalaya hi ka pisa ka la kren briew haba la dei ka por elekshon.
Nangta ki don ki Political Party kiba la mih ha ka jylla kiba da kren tyngeh shisha ïa ka jingpyndonkam pisa ha ka por elekshon bad u paidbah ruh u ïohi tyngkreiñ kini ki Party kiban pyndonkam pisa ha ka por elekshon, kino ki ban pyndonkam. Dei namarkane ka daw ba ki Party ha Meghalaya ki don kiba riewspah bad ki don ruh kiba duk. Ki don ki Party kiba la beh buk buk ka rukom pynlong jingïalang,ki don pat kiba leh kunai. Kane ka long kumjuh ruh ïa ki Kyrtong ha kaba ki don kiba leh puk puk ka pisa, ki don ruh kiba la leh kunai bad ym leh pahuh.
Wat ka Election Commission jong ka ri India ruh ka kren pyrshah ïa ka jingpyndonkam pisa ha ka por elekshon. Dei namarkata ka daw ba ka haba pyntreikam ïa ka Model Code of Conduct, la khang pyrshah ruh ban rah pisa ne ban kit pisa palat ïa ka 50 hajar tyngka marwei. Ha kine ki khyndiat sngi baladep ki bor pynïaid elekshon, ki la ïoh ban kurup haduh lai sien ïa ka pisa kaba la don ba rah palat ïa ka 50 hajar, kata ha ka 19 tarik u Kyllalyngkot 2023, haba la ïoh ban bat bad kurup ka pisa na Umkiang haduh 10.72 lak tyngka.
Hynrei ka Election Commmission haba pynmih ïa ka Model Code of Conduct, ka la buh ruh ka jingpynmang tyngka ne ka la buh ruh haduh katno ki kyrtong ki lah ban pyndonkam pisa ha ka por elekshon, kaba mut ki kyrtong haba ki mih ban ïakhun ïa ka elekshon, ki hap pynlut ka pisa na ka bynta ki jingpyndonkam bapher bapher. Ka Election Commission ka la buh ruh ïa ki Expenditure Observer, ha kaba kine kin peit ïa ka jingpynlut pynsep jong ki kyrtong.
Hynrei kumba la ïohi hi, ka jingpyndonkam pisa ban thied ïa ki nongthep vote ka don beit wat hapdeng ki jingpynmih kyndon ka Election Commission. Ki kyrtong ki kham stad shibun shah ban ïa ki Election bad Expenditure Observer. Kaba donkam ka long ka jingsngewthuh hi na ki paidbah nongthep vote, namar ba kumba la ïakren baroh baroh, shisien ba la shim pisa por elekshon ka la long kumba shah thied. Ki paidbah ki jied ïa ki nongmihkhmat jong ki ba kin long ki shakri jong ki ha kaba wanrah ïa ka roi ka par, ban peit ia ka bit ka biang jong ki paidbah, ban peit ïa ka ïoh kam ïoh jam ki samla, ban peit ban kiba duk kin kiew ka ïoh ka kot, ki nongrepo kin bha ka rep ka riang bad kumta ter ter.
Lada ki paidbah ki khmih lynti than ïa ka jingïohnongh ne ka jingïarap shimet ka dei ka kabu ïa ki nongmihkhmat ban theh beit da ka pisa bad kim peit shuh ïa ka roi ka par ne ka jingdonkam jong u paidbah salonsar. Dei hangne ba ka jylla ka duh noh ïa ki nongïalam ba shisha, ki nongmihkhmat ki ban peit na ka bynta ka jingmyntoi jong ka jylla hi baroh kawei.