20 hajar shi lynti hap siew ki nongniah ha ki khyrdop khrong khajna ki Hima bad KHADC

Shillong, ïaïong, 12: Ka Meghalaya Commercial Truck Owner’s and Driver’s Association (MCTODA) ha ka sngi Baar ka la kam ba ki trai trok ki hap ban pynlut haduh T.20 hajar shi lynti tang haba siew pisa ha ki khyrdop khrong khajna jong ki Hima bad ka Khasi Hills Autonomous District Council (KHADC) kiba mih kum ki tit ha shilynter ka surok National Highway bad State Highway.
“Hadien ka jingïakhun kaba ar snem kynthih, ka Joint Secretary jong ka tnat District Council Affairs (DCA) ka Sorkar Jylla ka Kong A. Nikhla ka la pynmih da ka hukum ba la bthah ïa ki Hima bad ïa ka KHADC ban pynduh pyndam lut ïa ki khyrdop khrong khajna kiba don ha shilynter ka surok National Highway bad State Highway,” ong u President ka MCTODA u Bah Moslander Marngar haba ïakren bad ki lad pathai khubor ha ka sngi Baar.
Ka tnat DCA lyngba ka hukum ba la pynmih da ka Joint Secretary ha ka 9 tarik u Nohprah, 2021 ka la kdew, “ka khajna ba la lum da ki Autonomous District Council ka long katkum ka kyndon jong ka Para 8 jong ka Khyrnit Bahynriew jong ka Riti Synshar ka Ri India. Katba, kane ka bor ban lum khajna da ki Autonomous District Council bad ki bor Hima ka long tang hapoh ka jylli treikam jong ki bad kim lah ban tam pud shaduh ka surok National Highway bad State Road, kaba hap hapoh u pud u sam jong ka tnat PWD.”
Ïa kane ka hukum la phah ruh sha ki Deputy Commissioner jong ka East Khasi Hills District, ka West Khasi Hills District, ka South West Khasi Hills District ka Eastern West Khasi Hills District bad Ribhoi District ba kin pyntreikam ïa kane ka hukum.
“Hynrei kane ka hukum kaba la pynmih da ka Sorkar kam shym la treikam satia namarba ka shu bthah ïa ki nongwai khyrdop tang kum ka jingpyntip namarba haduh mynta ki dang don ki khyrdop khrong khajna ki bym pat khang satia ïa ki khyrdop ha shilynter surok,” ong une u nongïalam ka Seng.
U la ïathuh ba ki nongniah trok ki hap ban siew haduh T.20 hajar shi lynti ha ki khyrdop khrong khajna kiba ieng kynshreng naduh West Khasi Hills shaduh Ribhoi District tang ban leit pynhap ïa ki mar ki mata.
“Kane ka la ktah haduh katta katta ïa ki trai Trok. Ki don ki jaka haba ki nongniah trok ki kyntait ban siew pisa, ki nongkhrong khajna ki pyni da ka bor, ki byrngem byrsit, ki pynjot ïa ki kali bad ki sei ruh da ki tiar pynmynsaw. Don leilei ki khyrdop khrong khajna la shimwai da kiba kham don kham em ki pyndonkam ban pyntieng da ki pistol,” la kynnoh une u nongïalam ka Seng.
“Naduh ba ngi la ïoh ïa kane ka hukum ngi la phah sha ki nongniah trok bad sha ki trai trok da kaba bthah ba kim dei shuh ban dang siew pisa ha ki khyrdop khrong khajna ha surok. Hynrei hapdeng kine ki ar taiew ngi la ïakynduh jingeh, watla ki don ki khyrdop kiba la khang noh hadien ba la pynmih ïa kane ka hukum hynrei ki dang don pat ki khyrdop jong ka District Council kiba dang pynjynjar ïa ki nongniah kali khamtam ha ka por mynmiet da kaba byrngem byrsit bad pan pisa jubor na ki nongniah Trok. Don ruh ki khep ba ka la mih ruh ka jingïakajia haduh ban da poi sha ka jingmynsaw,” la kynnoh u Bah Marngar.
Shuh shuh u la ïathuh ba ki don ruh ki Constituency kiba nud ban kam ba ka khyrdop khrong pisa ka dei kaba la aibor da u MLA. Haba kylli, u Bah Marngar ula phla ba kane ka la jia ha Mawshynrut Constituency. “Ynda haba ki nongniah trok ki pan ïa ka jingthoh kaba la kam ba la aibor da u MLA, hynrei ki nongap khyrdop ki aidaw da kumwei pat,” u la ong.
Ha ka 22 tarik, ka Joint Secretary jong ka tnat DCA ka la pynmih biang sa kawei pat ka hukum ha ka 25 tarik, Rymphang, 2022 ba la bthah ïa baroh ki Deputy Commissioner jong ki District hapoh rilum Khasi, Jaiñtia bad Garo ba kin phah khang lut ïa baroh ki khyrdop jong ka Khasi Hills, Jaiñtia Hills bad Garo Hills Autonomous District Council bad ki khyrdop jong ki Hima kba don ha ki surokbah National Highway, State Road bad District Road.
“Ngi kwah ïa ka Sorkar Jylla haba ka la pynmih hukum ka dei ban pyntreikam. Hynrei ngi shem ba ïa ka hukum la shu pynmih arsap (proxy) khlem da pyntreikam pat ïa ka aiñ,” la kynthoh u Bah Marngar.
“Ha Lad Mawreng haba ki nongniah trok kim siew khajna, ki mih pynban da ki Pulit kiba pynieng ïa ki kali. Kane ka dei ka jingpyndonkam bakla ïa ka bor. Lada ka long kumne, kumno ngin shahniah ïa ka Sorkar, ka hukum kaba ki ai ki leh arsap (proxy) ban pynieng pat da ki Pulit ban pynap bad pynbor ban siew pisa (ïa ki nongniah trok),” u la kynnoh.
U la kam ruh ba ki nongkhrong khajna ki dawa T.500 na kawei ka trok kit mar hynrei ynda kyntait ban siew pisa tang ha ka sngi kaba bud la pynap pat da ki Pulit kiba khrong khajna syndon haduh T.1000 na kawei ka trok.
“Ngi kwah ban kyrpad ïa ka Sorkar la kumno kumno haba ka la pynmih ïa ka hukum ka dei ruh ban pyntreikam katkum ka aiñ,” ong une u nongïalam jong ka MCTODA.
Ha kajuh ka por, u la ïathuh ba ka Association kan sa pynlong ïa ka jingïalang ha ka 30 tarik mynta u bnai ha nongbah Shillong.