Kadei ka bhah ai kam, ai jam ha ki jait kam sorkar bapher bapher hynrei ïa ka pule puthi pat (ïa kaba la ju ïoh sngew ba la ong ba kam hap ha kane Reservation Policy) na ka bynta ki 3 (lai) tylli ki jaitbynriew bapher bapher ha Meghalaya–Khasi, Garo bad Jaiñtia kumjuh ruh ïa kiwei ki jait bynriew ba rit pait. Ki Khasi bad Jaiñtia la ai 40% bad ïa ki Garo 40% bad la sdang ban trei kam naduh ba la ïoh Meghalaya hi. Ha ka jingïadei bad kane la ïoh lad ban kylli ïa U Minister ba pura u ba nyngkong eh na ka Ri Lum Jaiñtia U Ma E. Bareh ha ka por ba u la shongthait noh na ka kam saiñ pyrthei bad la kylli ba balei phi la mynjur ban buh lang ïa ki Jaiñtia bad ki Khasi ha ka 40% katba ïa ki Garo pat haduh 40% marwei, Phi tip bad ym lah ban len ba ki Khasi ki long kiba stad ban ïa ki Jaiñtia namar ki skul kiba pawnam ki don ha Shillong, te kumno phi shu mynjur ïa kane. Ka long kumba ha ïalehkai football hapdeng ka team-A bad ka team-C.
Haoid ym lah ban len ba don hi ki khynnah skul Jaiñtia kiba kham wan shakhmat, hynrei katno eh haba ïanujur bad ki Khasi. Hato kam shongñia mo ba ki Jaiñtia kin ïoh la ka jong kumba ïoh ki Garo kumba pher ka jait bynriew. Une U Minister u ba nyngkong ka Ri Lum Jaiñtia u la ïathuh ba ïa kane la pynbeit ha Mendipathar (Garo Hills).
U Captain Sangma, Chief Minister u la ong kumne ‘HALOR KA RESERVATION POLICY, NGA KYRPAD JUR ÏA PHI’ (kata ka mut ïa U B. B. Lyngdoh bad ïa U E. Bareh) ba phin sngewbha ban pyrkhat sngew synei sngewlem ïa ngi ki Garo namar ki dang duna bha haba ïa nujur bad phi ki Khasi bad ki Jaiñtia bad ai ba kane kan long tang 15 ne 20 snem bad hadien yn sa ïa pynbeit pat.
U Ma E. Bareh u ïathuh badei halor kane ka jingkyrpad jur u Nongmihkhmat ki Garo ngi baroh 2 (ar) ngut ngi la sngewsynei bad ngi la mynjur ba ki Garo kin ïoh 40% bad ki Khasi bad Jaiñtia 40% khlem da kheiñ ïa ka jingbun ki briew bad kumjuh ki M.L.A. Ha ka jingshisha la dei ban don ka jingsngewnguh bad burom ïa ki Jaiñtia namar ki la shah shitom (sacrify) na ka bynta ki Garo. U Ma Bareh u ïathuh shuh shuh ba bunsien bunsien la pynkynmaw ia u Chief Minister ban pynbeit thymmai noh ïa kane ka Reservation Policy kumba la ïakren ba yn ïa pynbeit pat hadien 15 lane 20 snem, hynrei U Captain Sangma, Chief Minister u ba stad bad u ba buit sianti u pynjur da ka buhteng na uwei u snem sha uwei pat u snem haduh ba kynjoh mynta 50 snem. HANGNE LA IOHI IA KA DOR KI NONGMIHKHMAT, U NO U BASTAD BAD KINO KIBA BIEIT.
Halor kane, U Conrad Sangma, ula ong ym pat dei por ban pynkylla ïa ka bhah kam (Rupang 02.02.2022). Nangta ula bynrap shuh shuh ba ka Resrevation Policy ka dei ka mat kaba jwat, ula kyntait ban kren eiei (Mawphor 02.02.2022). Ym sngewphylla ïa kane ka jingong jong u, lym kumta un shah tangon ha la ki briew la jong. Ka wei ruh u ieit ïa la ka jait ka kynja.
Ka HSPDP, Youth Wing, ha ka jingshisha kan kyrshan ïa ka ban pynbeit thymmai, hynrei ka ong pynban ‘tang ka Khasi bad Jaiñtia State kaba lah ban weng ïa ka jingeh ka Reservation Policy (Mawphor 02.02.2022 ). Ka jingkren ka bym lah ban long ne urlong lano lano ruh, kaba long ruh kum ka jingkyrshan ïa U Chief Minister ha neng.
Sngew thamula pynban ïa U Renikton l. Thanghkhar, Minister, ha ka jaka ba un kyrshan hynrei u ruh u khmih lynti pynban ban ïoh ïa ka jingïakhlad noh bad ki Garo (Mawphor 02.02.2022). Lada kata ka jingkhmih lynti kam wan hato yn ïahun hi ba kan sah kumne sa katno phew snem.
U Nongïalam u wei na ka Sengbhalang ka HANM u ong ba ym lah ban pynkylla ïa kane ka Reservation Policy kaba mynta bad dei ban rah ruh ïa ka Winter Season ka Assembly sha Garo. Une ruh u kren ïa kaba dei namar u dei u Garo namar ban duh ïa kaba la ïoh te ym long.
Ka la dei kapor ban pynthymmai noh ïa ka RESERVATION POLICY halor kane ka nongrim: Ba ka la ïaid 50 tylli ki snem.
La ïathuh ba don kiba la leit pule halor ka hok (Reservation Policy) jong ki hynrei ki ïehnoh jyndat (surrendered) namar kim lah ban pyndep. Kumno hi kin lah haba ka bor jinglah (percentage) jong ki ka duna palat. Ha ka jingshisha ka skul pule (College) kim dei ban pdiang lada ki marks ki duna palat. Ki la dei ban pyrkhat ïa la ka burom ka skul jong ki hynrei imat tang namar ka pisa bai seat te matlah noh. Da kumne leh nohei ka dor ka seat ba la siew da ka sorkar Meghalaya. Kaba phah ruh kawei bad kaba pdiang ruh kawei khlem da pyrkhat ïa la ka jinglah. Hangno KA BUROM.
Ka Sorkar jong ngi bad ki SKUL BAH kiba pdiang ki la dei ka por mynta ban pyrkhat ïa kane ym ban shu phah bad pdiang ruh.
Ki katto katne ki paralok dkhar napoh sor ka ri India ki ju kylli balei ba ki khynnah skul jong phi na Meghalaya ki shait ïeh noh (surrender) ïa la ka pule halor ka lad ka kabu ksiar kaba biang bha. Lada ngin ïoh ma ngi te da lei lei ruh EM.
Lada ka don shisha ki kynnah skul kiba la phah pule bad ki ïehnoh jyndat (surrender) ka sorkar ka la dei ban pyrkhat thymmai noh ban shim da ka security deposit katkum ka dor ka seat khnang ba kan ym sepei ka pisa u paitbah.
Kawei pat ka sorkar kan pyrkhat sngewbha ban buh bhah (quota) noh ia kito ki candidate kiba la jankut rta ha ka thung kam thung jam kumba ka la ïabhah (quota) ïa kiba duna ki dkhot met.
