Shillong, Nohprah 29 : Ka Meghalaya ka la lah ban wanphai da kaba pynliem ïa ka Bihar ha ka lympung ïalehkai Ranji Trophy. Ka Meghalaya ka la pynliem da saw wicket ïa ka Bihar ha ka jingïalehkai na ka plate group ha ka jingïakhun hynne ka sngi Palei ha madan ïalekai kriket jong ka MCA ha Polo.
Ha ka sngi kaba lai ka Bihar ka la sdang ban tied biang ïa ka 73/3, da kaba lamkhmat da 170 ron, hynrei ka Meghalaya ka la lah ban ïalehkai bha ha ka liang ka kawang bol, ha kaba ka Bihar ka la duh noh hynñiew wicket ha ka jingkamai ba tang 26 ron bad shah pynhap lut baroh ki wicket da kaba kamai 99 ron. Kumta ka Meghalaya ka la hap ban beh ïa ka thong ba ban jop da 197 ron.
Ka Meghalaya ka la lah ban pyndep hadien ka jingïadihsha sngi ha kaba u Swarajeet Das u kamai 81 ron. Lyngba kane ka jingjop ka Meghalaya ka la shah kyntiew sha ka elite group ha ka samoi ban wan da kaba kamai 19 point.
Ha ka pali kawang bol, u Abhishek Kumar u khur 4 wicket ai kamai 26 ron katba u Akash K Choudhury (4/41), u Rajesh Bishnoi, u khur 2/19 bad u la lah ban pyndep ïa ka jingïalehkai da kaba khur 8/79. Ka Meghalaya mynta kan pynkhreh ban ïakhun pyrshah ïa ka Arunachal Pradesh ha Anand, Gujarat, naduh ka 3 tarik Kyllalyngkot 2023.
