Nongpoh, Ïaïong 10: Ban bteng ka jingshakri na ka bynta ki paidbah ka dong Ri Bhoi bad ka jylla hi baroh kawei, ka HNYF, Northern Region ha Ri Bhoi, ha ka sngi Saitjaiñ ka la lah ban pynskhem ïa ki nongïalam ba pura ka seng ha ka Shnong Umsawkhwan ha Ri Bhoi ba la tip kum ka HNYF Umsawkhwan Unit.
Na ka liang ki nongïalam ka HNYF Northern Region, ha jingïalam u General Secretary, u Bah Edelbert Nongrum ryngkat ka jingdon lang u Assistant Secretary, u Bah Donroy Kshiar, ka Kong Beti Jyrwa, President ka HNYF Women Wing lem bad kiwei kiwei ki nongïalam ki la ai syndon ïa ka jingpynskhem ïa kitei ki nongïalam ba kin shim ïa kata ka lyngkor kum ki nongïalam na katei ka Unit ban peit ban khmih na ka bynta ka eh ka shon ki paidbah ha katei ka shnong.
Haba pynskhem ïa kine ki nongïalam ka HNYF Umsaswkhwan Unit la ai mynsiem ruh da ka jingdon alng ki nongïalam shnong ba kynthup ïa u Bah Dalnes Pale, Secretary Shnong, u Bah Wanshan Nongkseh, Secretary ka Seng Samla Shnong, ka Kong M. Lakhiar,kaba dei ka Secretary ki Seng Longkmie lem bad kiwei kiwei ki nongïalam Shnong ka Umsawkhwan.
Ki nongïalam ba la pynskhem da ka HNYF kum kita ki nongïalam ka HNYF Umsawkhwan Unit ki kynthup ïa u President, Johny B. Nongkseh, Vice president, Nicky Nongkseh, General Secretary, Banshan Jala, Publicity Secretary, Elishon Lakhiar, Adviser, Reynold Nongkseh, Finance Secretary, Kitdor Nongkseh, Sport Secretary bad kiwei kiwei ki nongïalam bad ki dkhot kane ka Unit.
Ïa kine ki nongïalam ka HNYF Umsawkhwan Unit la pynskhem da u Bah Edelbert Nongrum, General Secretary ka HNYF Northern Region bad kum u nongïalam ba hakhmat ka seng, ha kane ka sngi u la ai ruh ki kyntien sneng ki kyntien kraw sha kitei ki samla kiba la wan ban pynïasoh sha ka seng ba kin don kata ka mynsiem jong ka jingkitkhlieh na ka bynta ban ai ka jingshakri kaba bha tam sha ki paidbah nongshong shnong.
