Haduh 8 klur tam ka pisa (loan) jong ki nongrep SHG la aiti sha ki Bank

Jowai, Nohprah 15: Ka Meghalaya State Rural Livelihoods Society (MSRLS) lyngba ka ophis District Mission Management Unit (DMMU) West Jaiñtia Hills mynta ka sngi kala pynlong ïa ka prokram ba shisngi kaba la tip kum ka “SHG Meet cum credit Camp” ha Dorkar Hall jong ka Shnong Ladthadlaboh, Jowai.
Kane ka prokram ka long kyrpang na ka bynta ki nongrep (SHG) kiba don hapoh ka West Jaiñtia Hills District bad ban pynsngewthuh ïa ki shaphang ki lad jingïarap kiba lah ban ïoh na ki Bank ha ryngkat ka Subsidy kaba rit, kine ki SHG ki lah ruh ban shim ïa ka pisa haduh 6 lak ne tam khlem donkam ban khuslai lada ki lah ban siew khyndiat khyndiat manla ki por.
Ha kane ka sngi na ka liang ka ophis lyngba ka jingïarap jong ki Bank la lah ban ïarap pisa (Sanction Letter) sha ki nongrep ka District hapoh ka Social Security Schemes kaba la kot haduh 8 klur tam ka pisa.
La sdang ïa ka prokram da ki kyntien pdiang na u bah R. Shadap DMM WJH ha ka jingdonlang u kongsan u P.K Boro, PD DRDA & Nodal Officer DMMU WJH, u bah R. Lyngdoh Regional Manager MRB, bah R. Kynta, COO MSRLS, u bah G. Kharlukhi AGM NABARD, WJH, ki Manager jong ki Bank bad ki nongrep na ki SHG kiba don haduh 670 ngut kiba la wan poi sha kane ka jingïalang.
Na ka liang u P.K Boro kum u kongsan ula aiti ruh ïa Cheque sha ka Meghalaya Rural Bank (MRB) ban sanction pisa sha ki nongrep SHG ka District kiba don 691 tylli kaba la kot sha ka T.7,39,40,000/- tyngka, sha ka MCAB na ka bynta ki 100 tylli ki SHG Application kaba kot 1 klur tyngka bad sha ka Canara ïa ki 3 tylli kaba kot 2,50,000/-.
U Bah G. Kharlukhi AGM NABARD, WJH haba kren ula pynsngew kane ka prokram kan ïarap kyrpang eh ïa ki longkmie kiba wan na ki kynhun SHG, ula batai ruh shaphang ki loan na ki Bank ba ki SHG ki lah ban ïoh khnang ban pynkiew shuh shuh ïa ka kamai kajih.
Ula kyntu ruh ïa ki nongrep ba kin ïatreilang bad ka sorkar khnang ba yn lah ban pynkiew ïa ka roi ka par ha ka kam rep kam riang ha ki thaiñ nyngkyndong. Ula ong ba ka ophis kala pyrshang ban wanrah ïa ka pisa shapoh ka jylla lyngba ki Bank ban pynpoi sha ki nongrep.
U bah R. Lyngdoh Regional Manager MRB ula pynsngew ba ka jongpyntreikam ïa ka National Rural Livelihood Mission (NRLM) Skim kala kynjoh sha ka 2861 ngut ki longkmie kaba la kot sha ka 89 klur tyngka katkum ka jingkheiñ ha ka snem 2021-22, ula pynsngew ba ka MRB kala ïoh ïa ka khusnam National Award ha ka jingïadei kam bad ki nongrep SHG ha u snem 2021-2022.
Ula pyntip tang hapoh ka West Jaiñtia Hills la dep Sanction pisa ïa ki 700 tam ki Application bad ka pisa ka la kot sha ka 7 klur tam. Ula ong kiba bun kiba apply loan ka long tang hapoh shilak tyngka hynrei katkum ka jingmang lah ban apply haduh 6 lak bad kane ka long kaba suk ban sanction pisa na ka bynta san snem.
Katba u bah R. Kynta, COO MSRLS ula pynsngew haba sdang ïa ka National Rural Livelihood Mission (NRLM) hapoh ka jylla ki don tang kumba 128 tylli ki SHG kaba sngewkmen mynta ka la poi sha ka 44 hajar tylli ki SHG ha ka jylla bad haduh 4 lak 40 hajar ki longkmie kiba don bynta lang kane ka la urlong lyngba ka jingïarap lang jong ki Bank bad kiwei de.
“Ka thong jong ka NRLM ka long ban seng ïa ki SHG bad iwei pa iwei na ki longkmie na ka longïing ki dei ban long member ha ki SHG, kumba long mynta 95 present ki longkmie kila long kiba shim bynta hapoh ki SHG, ha kaba ïadei bad ki Village Origination (VO) kila don haduh 5200 tylli hapoh ka jylla kine kila don ha manla ki shnong bad mynta ka sorkar ka thong ban seng sa ka Cluster Level Forum (CLF) ban kham pynsuk shuh shuh ïa ki nongrep ban ai jingtip shaphang ki skim jong ka sorkar jylla”.
“Haba seng ïa kine ki lai tylli ki bynta ka SHG, VO bad CLF” u bah Kynta u ong ka sorkar ka lah ban ai jingïarap lyngba ki Fund bapher bapher kiba wan tang shisien, nalor kata ki kyntu ban leit mih sha ki Bank bad ban shim ïa ki ram, ula ong ruh ba kane ka ophis kala pyrshang ban wanrah ïa ka jingkylla naduh ka koit ka khiat bad ka jingïadei ha imlang ka sahlang.
Haba ai jingkren na ka liang u P.K Boro kum u kongsan u ai ka jingïaroh ïa ki SHG hapoh ka District kiba la nang ïai kiew katba nang mih ki sngi, ha ka juh ka por u kyntu ïa ki nongrep SHG hapoh ka District ba kin pynleit jingmut da kaba trei shitom ïa ka kam haduh ban da lah ban ai kam na ka bynta kiwei de (entrepreneur).
“Kum ka kynhun ka dei ban peit bniah ne don ka (plant) ïa ka rukom pynlut pynsep katkum ka jingdonkam, ula ai nuksa ba ka West Jaiñtia kala long kaba la pawnam bha mynta ha ka kam rep da ka jingpynmih ïa ki Shynrai Lakadong ula ban nam kylleng ka pyrthei bad kumjuh na ka jingshna khiew khyndew kaba pynmih na ka shnong Larnai. U kyrmen lyngba ki SHG kan jylla kan dang kiew shuh shuh ha baroh ki liang.
Ha kane ka sngi la pynphuh pynphieng shuh shuh da ki jingrwai na ka kynhun Moodymmai VO bad ka jingshad tynrai na ka kynhun Wyrcha VO.