Ka Ri Bhoi District ka dei kaba ju sei ïa ki nongïalam, hynrei la wan ïuhroit da ki heh spah : Charles

Nongpoh, Nohprah 11: Haba ther halor ka jinglong jingman bad ka jingshah iuhroit ki paidbah ka Ri Bhoi District ha ka kam sainhima sima, u Bah Charles Marngar u la ong ba ka Ri Bhoi District ka dei kawei na ka District kaba ju sei ïa ki nongïalam ba khraw ha ki por ba la leit noh, hynrei ha kine ki khyndiat sngi ka la shah iuhroit noh da ka jingwan ki heh spah kiba kam ba ki ieit jaid bynriew, hynrei kiba shu wan tang ban pynbiej ïa ki paidbah na ka bynta ka jingmyntoi shimet bad ban ioh kurup ïa ki jingdon jingeh ka Ri Bhoi haba la pynkup bor da ki paidbah.
U Bah Charles Marngar, MDC ka Mawhati bad u President ka Ri Bhoi District Congress Committee u la kynthoh jur ïa ki heh spah kiba wan ïa khun election na Ri Bhoi, ka dei ha ka jingïalang ba ka Ri Bhoi District Congress Committee ka la plie paidbah ïa ka ophis treikam ha Umlyngkdait ba la wan ban plie da u Ma Vincent Pala kum u President ka MPCC bad ruh ba la phah ïa ka kyrteng jong ki 4 ngut ki kyrtong ban ïa khun ha kane ka election 2023 na Ri Bhoi District sha u President ka MPC bad u ban sa phah pat sha Delhi ban pynskhem kum ki kyrtong ba pura ka Party Congress na Ri Bhoi District.
U Bah Charles Marngar u la ong ruh ba ki paidbah ka Ri Bhoi ki la dei ban kylla thiah kylla dem noh ha kane ka election 2023 ha kaba ki la dep ruh ban mad kaei kaba la leh da kita ki nongïalam heh spah kiba wan ban ïa khun na Ri Bhoi tang ban pynbiej ïa ki paidbah bad ka thong ba na sha lyndet ka dei tang ban don ha ka bor na ka bynta ban kurup ïa ka spah kaba don hapoh ka dong Ri Bhoi District.
“Ym lah ruh ban len bad ki jingshisha ki paw ba kita ki heh spah ba wan ïa khun na Ri Bhoi ki wan tang ban pynbiej ïa ki paidbah ba lui lui ka dong Ri Bhoi bad ki jingshisha ki paw pyrthei ruh ba ki wan ruh ban ïa khun na Ri Bhoi ka long tang ban pynlong ïa ka Ri Bhoi District kum kata ka ktem ban ïa kamai spah” ong u Bah Charles Marngar.
Ha kane ka kynti jong u snem 2023 wat la bun kita ki nongïalam bad ki party kiba pyrshang ban theh umpjah ïa ka party Congress ba kam poi shuh shaei shaei, u Bah Charles Marngar u la ong ba ka party Congress kam kheiñ snep satia ïa kita ki jingkynnoh ne ki jingkynthoih, hynrei ai ba ki paidbah hi kin bishar halor ka jinglong jingman ka jylla ha kaba kita ki party kiba la don ha ka liang synshar bad kiba kam ba ki trei na ka bynta ki paidbah aiu ki la leh na ka bynta ki paidbah.
U la ong ruh ngim da donnkam shuh ban pynpaw kaei kaba la jia ha ka jylla bad ki paidbah ruh ki sakhi ïa kata naduh ka jingkyrduh kam kyrduh jam ki samla, ki jingbym don ka shongsuk shongsaiñ bad ka jingshah iehnoh bein ki paidbah ha khappud bad ka long kaba sngew thamula tang shuwa ka election ki pyrshah ban kren ieit jaid bynriew bad baroh shi katta shaei jah kita ki nongmihkhmat kiba don ha ka bor naduh ka kam pud ka kam sam bad haduh ki kam kiba shah ktah ki paidbah ha ka jylla, ong u Bah Charles Marngar.
Namartkata, u la ong ba ka party Congress kan ieng skhem ha la ka nongrim bad kum ka party kan trei bor bah na kabynta ka jingshah khnoit bein ki paidbah, namar ka thong jong ka party ka long ban wan rah shibun ki jingkylla bad ki jingmyntoi ki paidbah bad ïa kane la sakhi ruh haduh mynta kiba bun ki jingmyntoi ba ki paidbah ki dang ioh ha ka jylla ki dei ki matti jong ka party Congress suda, u la bynrap.
Na kane ka jingïalang ka party Congress ha Ri Bhoi, ki saw ngut ki kyrtong ba la pynpaw pyrthei ki kynthup ïa u Dr. Celestine Lyngdoh na Umsning, u Adrian C. Mylliem na Jirang, ka Kong Rona Khymdeit na Nongpoh, u Bah Charles Marngar na Mawhati bad na Umroi ka party shen ka san pynbna ïa ka kyrteng jong u kyrtong.