Ka HSPDP kan ïai dawa Khasi Jaiñtia State bad dawa weng ïa ka para 12 (A): K.P.Pangniang

Nongstoiñ, Nohprah, 11: “Katba ki sngi ban ki snem ki nang tyllun ki paidbah nongshong shnong ka ri lum Khasi Jaiñtia, ki dei ban puson janai halor ki mat jingdawa kiba kongsan kiba u (L) maieit Hopingstone Lyngdoh u la pruid dak na ka bynta ki paidbah Khasi Pnar”, ong u bah K.P.Pangniang MLA/MDC barim ka Rambrai Jyrngam Constituency haba ïa kren bad u nongthoh khubor ha kine ki khyndiat sngi ba la dep.
U bah Pangniang u ba bat mynta kum u President ka HSPDP, u la ong ruh ba kitei ki ar tylli ki jingdawa kiba utei u nongseng jong ka HSPDP u la pruid dak, ki dei ruh ki maw nongrim kiba skhem na ka bynta ban ïada ïa ka jaidbynriew Khasi Pnar na ka jingsynshar don bor jong ka sorkar India.
U la ong ruh ba ka jingdawa Khasi Jaiñtia State ka dei ruh ka mat kaba u (L) Maieit Hoping, u la pynkynmaw biang ha ka General Council jong ka party kaba la long ha u snem 1997, ha kaba u (L) Clifford Marak u nongseng jong ka party trai ri ka Garo National Council (GNC), ki para nongmihkmat na katei ka party bad ki paidbah nongkyrshan, ki la ïa mynjur lang bad ki la sngew dei ruh ba lada ki paralok Khasi Jaiñtia ki kyrshan ïa katei ka jingdawa, ki paralok Garo ruh kin ai ka jingïatreilang, namar ba lada katei ka jingdawa kan urlong ka ri lum Garo kam don kam shuh ban dang leit dawa na Delhi bad ïa ki maw pud maw sam ki la dep pruid dak bad pynskhem naduh ba la ïoh ïa ka jylla Meghalaya.
U la pynkynmaw ruh ba ha ka General Council kaba la long ha u snem 1997, u (L) Clifford Marak u nongseng ka GNC ryngkat ki paralok jong u ki la wan ban ïasnohktilang. Naduh utei u snem baroh ar tylli ki dang ïatreilang haduh mynta ban pynurlong ïa katei ka jingdawa, kumba ki la dep phah da ki Memorandum sha ka sorkar India na ka por sha ka por.
Ha kaba ïadei bad ka Para 12 (A) pat u bah Pangniang u la pynkynmaw ba ha u snem 1986-88 ka HSPDP ha ka jingïalam jong u (L) Maieit Hoping, ka la khot ïa ki nongïalam jong ki hynriew jait ki jaidbynriew rit pait kiba shong ha ki jylla ka thaiñ shatei lam mihngi ha ka jingïalang kaba la pynlong ha Shillong. La khot lang ruh ïa baroh ki Chairman jong ki District Council ha kaba ki la ïapoi lut ha katei ka jingïalang.
Ha katei ka jingïalang la ïathir sani bha halor ka Para 12 (A) bad da kawei ka sur baroh ki la ïa mynjur lang ban dawa na ka sorkar India ba ka, dei ban pynkylla noh ïa ka 6th Sechedule bad ïa ka para 12 (A). Ka jingïalang ka la shim ruh ïa ka rai ba ïa baroh ki District Council yn pynkylla noh sha ki Autonomous Council, namar ki Autonomous Council ki don ïa ka bor kaba khlaiñ ban ïada ïa ki hok longtrai man trai bad ki riti ki dustur bad ha kaba ïadei bad ka pisa tyngka na ka bynta ban theh ki jingïarap sha ki paidbah.
U la ong ba kumba ka long mynta ka jingtreikam jong ka Para 12 (A) ha kane ka jylla ka la pynlong ïa ki bor jong ka sorkar pdeng ba kin pyntreikam ïa ki aiñ khyllah kum ka jingkhang khyrdep jong ka National Green Tribunal ban tih bad shalan dewïong, ka jingkhang ban tih maw tih shyiap bad kiwei kiwei kiba ktah haduh katta katta ïa ka kamai kajih bad ka ïoh ka kot jong ki trai jylla.
Kumta sa shisien pat kum u nongïalam ka party u kyrpad bad kyntu ïa ki riew stad, riew shem phang, ki heh sorkar la ki dei ki IAS, IPS, IFS kiba dei ruh ki briew kiba la shem phang bha ïa ki aiñ ki kanun bad ki paidbah ka ri lum Khasi Jaiñtia, ba kin kyrtiang dien sha kitei ki maw nongrim ba u nongseng ka HSPDP u la iehnoh shadien.
Lada ki kwah ba ka rngiew jong ka Jaidbynriew kan khie rasong sa shisien bad ba ki hok longtrai man trai jong ka khyndew ka shyiap, ka riti ka dustur, ka ïoh ka kot bad ka longbriew man briew kan nang skhem, ka donkam ba kin mih shakhmat.