Nalor ka 5lak, thmu ka sorkar ban pynkiew shuh shuh ïa ka bai lutsan sha kiba ïap ha Mukroh

Shillong, Nohprah 10 : Ka sorkar jylla ka la pynkhreh ban kyntiew ïa ka jingïarap pisa sha ki longiing jong ki san ngut ki lanot kiba la kyllon ïap ha ka jingshah siat ha ki pulit Assam ha Mukroh ha ka 22tarik u Naiwieng mynta u snem.
Haba kren bad ki lad pathai khubor, u Symbud Myntri Rangbah ka jylla, Bah Prestone Tynsong u la ong, “Ka Sorkar ka la bthah ïa ka tnat Revenue ban pynkylla noh ïa ka katto katne ki kyndon kiba don ha ka aiñ ban ai jingïarap pisa sha ki lanot, khnang ba yn lah ban kyntiew ïa ka jingïarap sha ki 5 tylli ki longïing ha Mukroh.”
Nalorkata, u la ïathuh ruh ba ka tnad mynta ka la sdang ïa ka kam haba ïadei bad katei ka bynta.
Ha kaba ïadei bad ka jingdawa ban thung kam ïa kiba ha ïing jong ki 5 ngut ki rangbah kiba la khlad, u Bah Prestone u la ïathuh ba ïa kane ka Sorkar ka dang bishar bniah namar ka buh shwa ha khmat kumno ban kyntiew ïa ka jingïarap pisa sha kitei ki longïing.
Haba jubab halor ka jingkylli, u Symbud Myntri Rangbah u la ïathuh ba na ka bynta ki ar ngut kiwei pat kiba mynsaw ha katei ka jingshah siat, na ka liang ka sorkar ka la bishar ruh kumno ban ai ka jingïarap pisa ba shisien ai. U la pyntip ba na ka liang ka Sorkar ka la bah khlieh ïa ka jinglut jingsep ha kaba ïadei bad ka jingsumar ïa kine ki ar ngut.
Lah ban kdew ba hadien ka jingjia shah siat ha Mukroh ha ka 22 tarik u bnai ba la dep, kaba la shim ïa ka jingim jong 5 ngut ki rangbah ha Mukroh bad mynsaw 2 ngut, na ka liang ka Sorkar ka la pynbna ban ai mar T.5 lak sha ki longïing jong kiba la khlad bad ban siew ruh ïa ka bai sumar jong kiba la mynsaw.
Dang ha ka taiew ba la dep, na ka liang u Myntri ka tnad Arts & Culture ba dei ruh u MLA ka Shillong South, Bah Sanbor Shullai u la kyntu ïa ka sorkar jylla ba kan wad ki lad ki lynti kumno ban ïarap ïa kitei ki longiing kiba ki nongkamai ha iing ki la hap ban shongiing bad shah sumar ha NEIGRIHMS Hospital na ka jingshah siat ha ki pulit Assam.