Shillong, Nohprah, 10: Ka Hynñiewtrep Youths Council (HYC) ha ka sngi Thohdieng ka la dawa ïa ka Meghalaya Medical Services Recruitment Board (MMSRB) ban pynkynriah noh ïa ka tarik ban pynlong ïa ka eksamin thungkam ha ka tnat ka Koit ka Khiah ba la buh sngi ban pynlong ha ka 14 tarik mynta u bnai bad ban pynshai bniah ruh ïa ka jingdon jong ki Post Medical & Health Officer (M&HO) bad ki Junior Specialist.
Halor kane, ki nongïalam ka HYC ki la aiti da ka jingthoh ha u Chairman jong ka Meghalaya Medical Services Recruitment Board (MMSRB) u Dr. Joram Beda bad dawa ruh ba ka jingthungkam ka dei ban long kaba khuid bad kaba shai bad ba ki trai ri trai muluk kim dei ban shah leh shiliang khmat.
Ha ka jingïakren bad ki lad pathai khubor, u General Secretary ka HYC u Bah Roykupar Synrem u la buh jingkylli ïa ka Sorkar da kaba ong, “ka Sorkar ka leh aiu ha ki saw snem ba la leit noh. Ha ka por ba ka jylla ka la shah lynshop ka jingpang khlam COVID-19 ki paidbah ki la ud ïa ka jingduna doktor hynrei ka Sorkar kam shym la leh eiei ïa kane. Hynrei kynsan kynsan ynda la jan kut ka samoi shwa ban poi ka elekshon ka Sorkar ka la pynmih 400 tylli ki Post doktor.”
U la ïathuh ba u Dr. Joram Beda u la kular ba kan kan ïaid beit shakhmat bad ba kan ym don kano kano ka jingleh shiliang bad ba ka jingthungkam ruh kan long kaba khuid kaba suba.
Ïa ka Advertisement la pynmih ha ka 2 tarik, Nohprah, 2022 bad bthah ïa ki nongaplai ban thep noh hapoh ka 10 tarik, Nohprah, 2022. Ïa ka tarik ban pynlong eksamin la buh sngi ha ka 14 tarik, Nohprah, 2022. Ka HYC ka la pynpaw ruh ïa ka jingsngew artatien halor ka jingpynbeit ba la pynmih ha ka 8 tarik, Nohprah, 2022 ka la pynkylla lut ïa ki sngi ba la buh ban pynmih ïa ka Rejection List bad ka por ban ïoh jingpynshai bad sha ka sngi ban thoh ïa ka eksamin ka long kaba lyngkot bha.
“Katkum ka jingsngewthuh jong ngi kane ka jingpynkyrkieh ban pynlyngkot ïa ka por ka pyni ba ka Recruitment Board ka la shim sting ban ïoh ïa ki nongtrei kiba kynsai ha ka tnat ka Koit ka Khiah,” la pynpaw ka seng.
