Nalor ka kam jngohkai pyrthei sa sha ka kam rep tympew phai khmat ki nong Tyrna

Shillong, Nohprah 10: Namar ka jingbym seisoh shuh ka khyndew ban thung da ki soh ñiamtra kaba dei kawei na ki lad kamai ki nongshong shnong ka Tyrna dang tang ha ki khyndiat snem kiba la leit mynta pat kiba bun ki nongshong shnong katei ka shnong ki im ja na ka kam jngohkai pyrthei.
Kumba long mynta nalor ka kam jngohkai pyrthei ki nongshong shnong kane ka shnong ha kane ka kynti mynta ki la sdang ban phai khmat sa sha ka kam rep tympew namar ki lap ba une u jait jingthung u long bad seisoh bha ha kane ka thaiñ.
Haba ïakren bad uwei napdeng ki nongïalam shnong u Bah DL Syiemlieh u la ïathuh ba ka jingbym long shuh u soh ñiamtra ban thung ha ki bri ha kine ki khyndiat snem ka pynlong ïa ki nongshong shnong ban phai khmat noh sha kiwei pat ki jait kam bad ka jingwan ka kam jngohkai pyrthei sha kane ka shnong ka la mih bujli noh ban ai kam ïa ki nongshong ha kine ki snem kiba la leit.
U la ïathuh ba nalor ka kam jngohkai ki nongshong shnong mynta ki la sdang sa ka kam rep tympew ban long kawei na ki lad kamai jong ki khamtam namar une u jait jingthung u long bha ha kane ki sharing lum bad ki jaka rep jong kane ka shnong barim.
“Ka jinglong bha u tympew ka pynlong ba ki nongshong shnong ban phai khmat sha kane ka kam bad khamtam eh namar ka dor jong u ruh kam dei kaba tad hynrei kaba pynïohnong ïa ki nongrep,” u la ong.
Haba kylli haduh katno ka kam jngohkai ka ai kam ïa ki nongshong shnong, u la ïathuh ba nalor ka kam leit ïalam sha ki jaka ba don ka jingkieng jri sha Nongriat ki ïoh kamai ruh da ka kaba ki buh ïa ki dukan, ki jaka sah ki nongwan kai bad kiwei de ki jaitkam kiba mih da ka jingwan jingkai ki briew sha kane ka shnong.
Shuh shuh u la ïathuh ba ka jingwan ka kam jngohkai pyrthei ka la ai jingmyntoi shibun bha ïa ka shnong ha kaba ha ka shisnem ka kumno kumno ka shnong ka ju ïoh lum pisa da palat ïa ka 10 lak ha ka shisnem.
Lah ban kdew hangne ba kane ka shnong kaba ki nong Tyrna ki wan ban shong shnong thymmai ka dei namar ka jingjulor kaba shyrkhei ka shnong Tyrnarim kaba ki ju shong na ka daw u Jumaibah jong u snem 1897 kaba ka shnong ruh ka pynlong ïa ka lyngkhuh snem ba 125 jong ka jingkynriah shnong sha kane ka shnong thymmai.
Ban pynkynmaw ruh ba u Bishop ba nyngkong tam jong ka Balang Catholic napdeng ki Khasi u dei na kane ka shnong u Most. Rev Abp T Resto Phanrang uba la shah kyntang Bishop ha ka 23 Nailur 1990 ban long kum u Bishop synrop bad uba la shimti pat ban sharai ïa ka jylla niam kum u Archbishop pura ha ka 10 Nailur 1995.