Kat shaba leit mynta ïohsngew sa tang kita ki ‘High Level’ hapoh ka jylla ong u Mukul

Jowai, Nohprah 10: Hadien ba u ma Andrew Awhai Shullai uba long ruh u MDC ka Jaiñtia Hills Autonomous District Council (JHADC) ula rung sha party All India Trinamool Congress (AITC) kum ka jingpynithuh paidbah ïa u ma Andrew Awhai Shullai kum u kyrtong ka LA na ka 2-Jowai Constituency ka 2 Jowai LA Constituency TMC Block Committee kala pynlong ïa ka jingïalang paidbah mynta ka sngi 10.12.2022 ha madan Jrisaleiñ Jowai ha kaba palat 6 hajar ngut ki paidbah (haba kheiñ na ki shuki) kila ïawan sha kane ka jingïalang.
Ha kane ka sngi la ïoh ïa ka jingkren na ki nongkyrshan jong u ma Shullai kum u ma Philemon Lyngdoh Ex MDC, ma Madonbai Rymbai Ex CEM ka JHADC, bah George B. Lyngdoh MLA, Dr. Mukul Sangma MLA Ex Chief Miniester ka Meghalaya, uba long ruh u nongïalam ka liang pyrshah hapoh ka ïing Dorbar thaw aiñ jong ka jylla nalor kiwei de.
Kham hashwa la ïoh ïa ka jingkren pdiang sngewbha da u ma Rana Lakiang Vice President ka Trinamool Congress Jowai Block bad na u ma Andrew Shullai MDC uba long ruh u President ka Jowai Block Congress Committee bad uba pynithuh ïalade kum u kyrtong ka TMC na ka 2 Jowai Assembly Constituency.
Ha kane ka sngi la pynskhem ruh ïa ki TMC Block Member Committee jong ka 2 Jowai LA Constituency na ki shnong kiba hap hapoh ka 2 Jowai LA Constituency.
Ha kane ka sngi la ïadon bad sakhi lang da u Manas Ranjan Bhunia ba dei peit ïa ka TMC Meghalaya, u Charles Pyngrope MLA President Meghalaya TMC, u bah Waibon Sohlang Secretary Jowai Block Committee bad kiwei de ki nongkyrshan ba radbah jong u ma Andrew Awhai Shullai, katba ïa ka jingïalang la pynïaid da ka kong Rinibeth Patlong.
U Dr Mukul Sangma ha ka jingkren ula pynsngew katba nangmih ki sngi ka TMC hapoh ka jylla kala nang kiew da ka jingwan ïasoh jong ki nongïalam ba hakhmat, ula pynkymmaw ruh ba ki nongïalam napoh ka Ri-Lum Jaiñtia naduh mynshwa kila long shisha kiba trei shitom ban pynkiew ïa ka jylla kaba kynthup naduh ki kam pynroi bad ban wanrah ïa ka jingkylla naduh ki nongïalam kum u Prof. R.C Laloo.
Ula pynkymmaw ba ki don shibun ki kam pynroi kiba la dep sanction ban wanrah hapoh nongbha Jowai bad ha ka Ri-Lum Jaiñtia ha ki snem ba dep kiba kynthup ïa ka B.Ed bad ka Engineering College bad kiwei de hynrie haduh mynta kim shem la treikam khlem da don shuh kiba buddien bad kane ka bun jingeh pynban khamtam ïa ki paidbah nongshnong shnong jong ka Ri-Lum Jaiñtia, u kyrmen skhem ba ka TMC hapoh ka jylla ha kane ka kynti jong ka Election 2023 kan sa wan ha ka bor ban pyndep lut ïa ki kam ba sahteng.
Ula kynthoh jur ïa kane ka sorkar MDA ba mynta kaba la buh maw jyngthuh ïa ki khun samla kiba thmu ban wan kam wad jam wat hadien ba la pyndep ïa ki jingpule ha ki kyrdan bapher bapher, ula ong wat ïa ki kam sorkar kiba lait ruh kane ka sorkar mynta kam shem la khot Advertisement ban pyndap ïa ki.
Kane ka jingkyrduh kam jong ki khun samla kala long pynban ka jingeh ïa ka jylla hi baroh kawei namar wat ïa ki nongkhaïi, ki Contractor ka kam jong ki ka la hiar shaba palat bad kane kaba la wanrah ïa ka jinghiar ha ka ïoh ka kot jong ka jylla.
Kumta u kyntu ïa ki nongthep vote jong ka jylla ba kin jied ïa ka sorkar kaba trei hok bad ka sorkar kaba sngap ïa ka jingeh ki babuh ba lang, ula kynthoh jur ba mynta ka jingïohnong ka long satang kita ki High Level namar ‘kat shaba leit la ïohsngew satang kita ki High Level’. Shuh shuh ula kynthoh ïa ki kam bam sap jong kane ka sorkar MDA ba mynta naduh ka kam Smart Meter, ki surok bad kiwei de.
Ula pynkynmaw ba ka JHADC ka dei kawei na ki Council hapoh ka jylla kaba pynmih shibun eh ka khajna na ki marpoh khyndew da kaba ai nuksa kum u Dewïong hynrei mynta wat ïa ka tulop kaba shem shitom pynban ban siew ïa ki nongtrei. Naka liang jong u u kyrmen ba ka TMC kan wan ha ka bor ha kane ka kynti bad kin don bun ki MLA ki ban jop na kane ka party ha kane ka Election 2023.
La pynshong shit shuh shuh ïa kane ka jingïalang da ki jingpynbyrnia na ka kynhun Chiiung, ki jingshad tynrai bad kiwei kiwei de.