Kynshi, Nohprah 09: Ïa ka Rural Mart ba la pynïaid da ka Mawlaidong VO jong ka Shnong Kynshi Mawria ka la plie paidbah ha ka 8 tarik mynta u bnai da u DC ka Eastern West Khasi Hills District u Bah W. Nongsiej, IAS ryngkat ka jingïadon lang u BDO Mawthadraishan, u Bah L. Myrthong, MCS nangta ki ophisar jong ka NABARD, NRLM, MSRLS bad ki dkhot jong ki SHG na Kynshi Mawria bad ki shnong ba marjan.
Ïa kane ka Rural Mart lane ka dukan ban pynïaid ïew ïa ki jingshna ne ki jingmih na ki SHG, la plie da ka jingkyrshan pisa ka NABARD ryngkat ka jingïatreilang ka Meghalaya State Rural Livelihood Society, Block Mission Management Unit, Mawthadraishan.
Kane ka dukan ka don ha Steshon Kynshi ha ka dukan kaba ha armala, ha kaba la buh ïa i jingshna kum ki Ashar, ki Umsoh, ki Kriah, ki shang, ki symbai jhur, ka ngap bad kiwei kiwei de ki jingshna da ki SHG.
U DC haba kren ha kane ka jingplie ïa kane ka Mart, u la ong ba ka jingdon ki SHG ka long ka jingkyrkhu kaba khraw ïa ki longkmie baduk ba kyrduh, namar lyngba jong ki, ki lah ban treikam da kaba pynmih ïa ki ashar, ki umsohk, ki kriah ki shang , ban suh jaiñ bad kiwei kiwei ki kam kiban ïarap ban kyntiew ïa ka kamai kajih bad ka ïoh ka kot jong ki.
U la ong ba kane ka dukan kan ïarap ruh ïa kiwei pat ki SHG na kiwei pat ki Shnong ban wanrah ne pynïaid ïew ïa ki jingshna jong ki. U la ong ruh ba donkam ban pynïadei bad kiwei pat ki SHG na kiwei pat ki jaka bad ban shna bha ïa ki jingmih naduh ka rukom shna, ka rukom sop bad kumjuh ruh ban da ïaid lyngba ki kyndon jong ka sorkar kum ki Food Security License, khnang ban lah ban shalan shabar jylla ne wat shabar ri ruh.
La ïoh jingkren ruh na i Kong P. Nongkynrih, DDM jong ka NABARD, iba la ïathuh ba ka NABARD ka kyrshan ïa kane ka Rural Mark ban siew baiwai dukan na ka bynta lai snem bad kumjuh ruh ban siew ïa i nongap dukan na ka bynta lai snem kum ka da ka jingkyrshan lang ban pynïaid ïew ïa ki jingshna jong ki SHG.
La ïoh jingkren ruh na u BDO Mawthadraishan, bad kiwei de ki ophisar ba don lang ha kane ka jingïalang.
Ïa ka Mawlaidong VO la seng ha ka snem 2020 da ka jingïasnoh ktilang ki SHG ba don ha Kynshi Mawria. Nalor kaba pynïaid ïa kane ka dukan, ka VO ka ju peit ruh ïa ka jingkhuid jingsuba ka Shnong Kynshi Mawria da kaba ju pynkhuid shnong bad tam plastik arsien shi bnai.
