Pynkup burom ka HYC ïa ki khynnah ba khur takma ha ka 5th National Junior Kurash Championship

Shillong, Ïaïong 09: Ka HYC Sengkmie ha ka 8 tarik Ïaïong 2022 ka lah ïoh ban pynkupburom ïa 2 ngut ki khynnah kiba khur takma ha ka 5th National Junior Kurash Championship kaba lah pynlong da ka Indian Kurash Federation kaba long ha Jharkhand, Dhanbad myn ha ka 27- 29 tarik Lber 2022.
Ha kane ka sngi, ka HYC Sengkmie hapoh ka Jingïalam jong u Sports Secy CEC, Samla Franky Kharumnuid ka la ïoh ban pynkupburom ïa kine ki arngut ki khynnah kiba ïoh ïa ka takma Rnong. Iwei ha ka kyrdan ïakhun ba 40kg Below Girls i Ibalarisa L.Nonglait bad iwei pat ha ka 28kg Below Girls i Cazilia L. Mawphlang.
Ha kane ka sngi la ïoh ïa ka jingkren na u Samla Franky uba la kitbok kitrwiang ïa kine ki heprit ba kane ka dei tang ka jingsdang jong ki ban kynjoh sha kiwei ki kyrdan jong ka nam. U la ong ba dei ban shim ïa kane kum shi bynta na ki mawkyndon ban poi sha ka thong ba kham sha kliar bad kyntu ruh ïa ki ban ïai minot bad ïai kilan shuh shuh khnang ba kin ïoh wanrah ka nam ka burom ïa ka Jiadbynriew bad ka jylla baroh kawei.
U Samla u ai khublei ruh ïa u Head Coach jong ka Meghalaya Kurash Association, Bah Banlamphrang uba la ïalam ïa kine ki khynnah sha katei ka rynsan jinglehkai bad kitbok kit rwiang ba un nang ïa pynmih shuh shuh ïa ki rang bad thei ïalehkai ba kynsai jong ka Jylla.
Ha kane ka sngi u Samla Franky ula banjur ruh ba ka Sorkar ka la dei ban thaw lad thaw lynti ïa ki rang bad thei ïalehkai jong ka jylla ban pynïoh kam ïoh jam bad ruh ladei ban don ruh ka bhah kyrpang ïa kum kine ki jait jingïalehkai wat lada kam don jingïadei bad ka Olympic khnang ba kin ïoh mynsiem ki samla ban trei shitom bad minot ha ka Sports.
U ong ruh ba ki jingeh jong ki rang bad thei jong ka jylla ka long ba hadien ba lah shah jied ban mihkhmat na ka bynta ka jylla ki hap sa ban leit wad jingïarap na ki Company bad kumta ter ter ba kin ïoh ban leit shim bynta ha ki rynsan ïalehkai bapher bapher.
“Ka Sorkar ka la dei ban pyrkhat bad thaw ki lad jingïarap khnang ba kine ki nongïalehkai kiba shah jied ban mihkhmat sha ki rynsan bapher bapher ba kin ym donkam shuh ban leit wad jingïarap na kiwei pat bad ba kin pynleit jingmut beit ha katei ka kam ïalehkai,” la ong u samla Franky.