Mynta yn ujor mukotduma ka Sorkar pyrshah ïa u nongaiktien ka TMC

Shillong, Nohprah 6 : U Symbud Myntri Rangbah ka jylla u bah Prestone Tynsong mynta ka Sngi Ba Ar u la ther kylla ïa u nongaiktien ka All India Trinamool Congress (AITC) u Saket Gokhale da kaba kynnoh u long kum u riew shiteng khlieh namar kiei kiba ula kynnoh ba ka sorkar ka pyndonkam bakla ïa ka pisa ba 632 klur kaba dei jongka Meghalaya Ecotourism Infrastructure Developement Project MEIDP) ka long kaba bakla bad ka bym shisha hangno hangno ruh.
“ Kane kam dei shuh ka sien kaba nyngkong ba ula kynnoh bad ïalam bakla ïa ki paidbah khlem kino kino ki jingshisha ne jingpyn shisha u ïai leh na ka por sha ka por bad mynta ka kynti ka sorkar kam don jingmap shuh ïa une u shiteng khlieh namar ka la rai ban ujor mukotduma noh pyrshah ïa u sha ka ïing bishar lashai ka sngi” ong u Symbud Myntri Rangbah.
U Symbud Myntri Rangbah u la ong haba u kynnoh u dei ban don ki jingshisha hynrei une u briew u shu ïoh sngew nangne nangtai bad thoh beit ha ki social media lane ai da ki jingthoh kiba ym don ki jingshisha hynrei kiba bakla suda.
Kumta u bah Prestone u la ong ba ka sorkar kam lah shuh ban ïai sngap bad ïai shah. “ Ngi la kut ki jingïaishah namar kine ki jingkynnoh jongu ki long ki bym shisha suda kumta lashai hi ka sngi ka sorkar kan ujor mukotduma ïa u halor kine ki jingkynnoh pynkhlem raiñ bad pynjah burom jongu ïa ka sorkar. Nalor kata une u briew u la shah kem ruh ha ki pulit ka Gujarat hynne mynmiet namar u la kynnoh pyrshah ïa u Myntri Rangbah duh ka ri halor ka jingtwa ka jingkieng Morbi ha katei ka jylla kaba la wanrah ka jingiap ïa kiba bun ki mynsiem briew. Kumta phi la dei ban sngewthuh hi u jait briew uba kumno u long kat uta u nongaiktien jongka National Party ka AITC ba un shu kren bad kynnoh khlem ki jingshisha”.
U Symbud Myntri Rangbah ula ïathuh ruh ba kine ki projek MEIDF ki dei ki projek ba la bei tyngka da ka New Development Bank (NDB) kat kum kata ka Externally Aided Project (EAP). Nalor kata ki dei ruh ki projek ba ïarap da ka sorkar pdeng namar 90 % ka dei ka Grant bad 10 % ka dei ban ai da ka sorkar jylla.
“ Ngi la ïoh ruh ka jingmang pisa haduh 731 klur ym tang 632 klur kumba u Saket u la kynnoh ban pyntreikam ïa ki projek bapher bapher naduh u snem 2022 haduh 2026. Na kane ka 731 klur ki tender ba la khot ki long 9 tylli ki projek jongka tnad Tourism bad na kine ki 9 tylli tang saw tylli kiba la dep pyndep lut nadong shadong ki jingpynbeit ïa ki tender bad ai ruh ïa ka kam sha kiba dei ban ïoh. Kine ki 9 tylli ki projek ki dei kiba la mang 230 klur tyngka. ïa kaba sah ka pisa la nang pynkhreh ïa ki projek namar ki don lai tylli ki tnad sorkar kiba hap ha kane ka MEIDP. Kine ki long ka tnad PWD, tnad Tourism bad ka tnad Sport bad kine ki dei kiba khot tender bad pyntreikam ïa ki projek” ïathuh u Symbud Myntri Rangbah.
Halor ki jingkynnoh ba khlem buh jingkheiñ ne Audit ïa ka pisa ruh ka long ka bym shisha namar thik pa thik hap ban ai jingkhei0241 sha ka NDB. Une u briew u la myllien kumne la bun bun sien wat ïa ka Smart City Project ruh u dei une uba kynnoh khlem ki jingshisha.
U la ong ba ka jingthmu jong une u briew ka long tang ban beiñ ïa ka sorkar bad ban ïalam bakla ïa ki paidbah namar u pyrkhat da kaba u leh kumne kan don jingmyntoi ïaka AITC hynrei kam long satia kumta ha kane ka jylla namar ki paidbah ki tip bad kim jied ïa ka party hynrei ki peit ïa u briew uba lah ban shakri ïa ki paidbah.
“ Nalor kata katno sien ula kob ïatai nia ïa nga bad ïa u Myntri Rangbah ruh, ïa kaba ngim don por satia ban ïapyllut kai ïaka por bad une u jait briew namar u dei uei eh” ong u bah Prestone.
Haba la kylli balei ba ki nongïalam ka AITC ki shu sngap jar namar kaneka jingleh jongu kan ktah ïa ka party hi ha kane ka jylla u bah Prestone u la ong “ Nga ruh nga lyngngoh ngaiñ balei ki shu sngap jar ha ka jingshisha haba ki la ïohi ba ym ju don jingshisha ha ki jingkren jingkynnoh jongu ki la dei ban wan shakhmat ne ong ïa u ban ym kren ei ei hynrei kim leh ïa kata ki kwah ban shah ktah hi ka party jongki hi tharai”.
U Symbud Myntri Rangbah u la pynshai ruh ba kat kum ki kyndon la hap ban thaw ïa ka Meghalayan Age Ltd bad la register ruh ïa ka kum ka kompani kat kum ki kyndon aiñ bad kane ka shu peit bad pynïaid ïa kine ki projek hynrei kiba pyntrei ki dei ki tnad sorkar hi. Kata ka PWD, Tourism bad Sport. Kine ki khot hi ïa ki tender bad dei ma ki ki ban bishar bad pynbiang ïa ki tender shwa ban ai sha ka NDB. Kumta ki jingkynnoh jongu Gokhale ba ka rukom khot tender ruh kam long kaba shai ka long kaba bakla namar ïa ka tender la khot beit Online.