Kyntait u Bah Metbah ba don jingïapait bad ka jingbym ïasngewthuh jingmut ha ka UDP

Shillong, Nohprah 06: U President ka UDP u Bah Metbah Lyngdoh ha ka sngi Ba-ar u la kyntait ba ka don ka jingïapait ïapra bad ka jingbym ïa sngewthuh jingmut ha ka party.
Haba kren bad ki lad pathai khubor hadien ba la dep ka jingpynbna kyrtong, u Bah Metbah u la ong ba ka party kumba ka long mynta ka don hapdeng ka jingïatylli bad ka jingïasngewthuh jingmut bad lada don ki khep kiba don ka jingbym ïa mynjur ha ki katto katne ki mat ruh hynrei i dei tang ka kam ïing kam sem barit eh jong ka party kaba yn ïakren tang hapoh ka party.
Haba la kylli pat halor ka jingbyrngem u Bah Bindo M Lanong ban thaw seng saiñ pyrthei thymmai, u Bah Metbah u la ong ba a ka liang jong u um kwah ban ong eiei namar kaei kaba u kren u Bah Bindo u ïohi dang tang lyngba ki kot khubor hynrei um pat ïoh ban ïakren markhmat halor kane ka mat.
Haba la kylli halor ka jingthmu jong u ban ïakhun na Mawphlang, u Bah Metbah u la ong ba kaei kaba mih ha ki katto katne ki lad pathai khubor ka dei kaba bakla namar um shym don jingmut satia ban leit ïakhun sa na Mawphlang nalor ka Mairang kaba u la mihkhmat mynta.
“Ka dei kaba bakla ban ong ba ngan ïakhun na kitei ki ar tylli ki constituency nga kwah ban kren shai ba ngan ïakhun beit tang a Mairang,” u la ong.
U la bynrap ruh, “Na Mawphlang kumba long mynta ngi la don u kyrtong uban ïakhun bujli ha jaka u Bah Eugene MLA ba mynta namar ka jingbym treh aireng shuh jong u, hynrei namar une u kyrtong jong ngi u dang don ha ka kam sorkar ngim pat lah satia ban pynbna ha kane ka thup kaba mynta.”
Haba kylli lano ka thup ba ar jong ki kyrtong ka UDP yn sa pynmih, u Bah Metbah u la ong ba la kumno kumno ha shuwa ka Khristmass yn sa pynbna ïa ka thup ba ar ki kyrtong.
“Kumba long mynta ngi buhthong ban pynïakhun na baroh ki constituency bad ngi kyrmen ruh ba ngin ym long shuh tang ki nongthung syiem hynrei ngin ïalam syndon ïa ka sorkar,” ïathuh u Bah Metbah.